Sot në mesditë skadon afati për të gjithë ata që synojnë të garojnë për postin e kryetarit të Partisë Demokratike, partisë më të madhe të opozitës në vend.
Deri tani, i vetmi kandidat i konfirmuar është lideri historik i kësaj force politike, Sali Berisha, i cili pritet të jetë edhe kandidati i vetëm për drejtimin e PD në katër vitet e ardhshme.
Sipas udhëzimit të miratuar më 18 mars, çdo kandidat duhet të dorëzojë dokumentacionin brenda orës 12:00 të datës 30 prill. Ky udhëzim parashikon disa kritere të qarta: kandidatët duhet të kenë të paktën 10 vite anëtarësi në PD, profil të lartë publik e politik, përvojë drejtuese në betejat e partisë dhe të mos jenë subjekt i ligjit të dekriminalizimit.
Ndërkohë, zgjedhjet për kryetarin e PD janë caktuar të mbahen më 23 maj. Edhe pse ish-deputeti Ervin Salianji ka shprehur publikisht ambicien për të kandiduar, ai nuk mund të marrë pjesë në garë pasi është përjashtuar nga partia.
Në këto kushte, gara duket se do të zhvillohet me një kandidat të vetëm, ku Sali Berisha do të kërkojë mbështetjen e demokratëve për të udhëhequr Partinë Demokratike në katër vitet e ardhshme.
Berisha ka qenë një figurë dominuese në PD që prej themelimit të saj në dhjetor 1990. Ai u zgjodh për herë të parë kryetar në vitin 1991 dhe e mbajti këtë post deri në vitin 1992, kur u bë President i Shqipërisë. Më pas u rikthye në krye të partisë në vitin 1997, duke e drejtuar deri në vitin 2013, kur dha dorëheqjen pas humbjes së zgjedhjeve parlamentare.
Në shtator 2021 ai nisi lëvizjen “Foltorja”, pas përjashtimit nga grupi parlamentar nga Lulzim Basha. Në dhjetor të po atij viti, anëtarësia e PD vendosi shkarkimin e Bashës, ndërsa më 22 maj 2022, Berisha u rikthye zyrtarisht në krye të Partisë Demokratike.
