Izraeli do të jetë kundërshtari i pari i Shqipërisë në miqësoret e muajit qershor.
Federate Shqiptare e Futbollit konfirmoi testin e dytë të kuqezinjve në datat e lira të fillim qershorit, teksa më herët ishte zyrtarizuar edhe testi ndaj Luksemburgut po në Tiranë në datën 6 qershor. Përfaqësuesja jonë do të përballet më 3 qershor, në orën 20:00, me Izraelin në stadiumin kombëtar në Tiranë.
Kjo do të jetë përballja e 7 në histori mes Shqipërisë dhe Izraelit dhe e para miqësore, pasi të gjitha takimet e mëparshme janë zhvilluar në kuadër të kualifikueseve të kampionateve botërore dhe europiane. Kuqezinjtë kanë fituar dy dhe kanë humbur katër sfidat e tjera.
Miqësorja ndaj Izraelit është një zgjedhje e guximshme sidoqoftë, e cila do të kërkojë me siguri edhe impenjim shtesë në aspektin organizativ dhe veçanërisht në shtimin e masave të sigurisë për shkak të konfliktit të hapur në Lindjen e Mesme mes këtij vendi dhe Iranit, teksa kujtojmë që edhe në 2016 apo 2018 qindra efektivë dhe agjentë antiterrori u angazhuan në terren për të shmangur incidente të mundshme.
Madje në vitin 2016 pati dyshime të mëdha për planifikimin e një sulmi terrorist, për të cilin u arrestuan katër persona në Shkodër, gjë e cila bëri që organizimi i ndeshjes të spostohej nga “Loro Boriçi” drejt stadiumit “Elbasan Arena”.
Pakënaqësia mbi masat shumë të rrepta të sigurisë në “Elbasan Arena” ishte maksimale dhe një pjesë e madhe e tifozëve lanë stadiumin përpara kohe në shenjë proteste.
