Kreu i demokratëve, Lulzim Basha shprehet se kryeministri Edi Rama ka lënë në baltë shqiptarët me premtime të pambajtura, teksa sjell si shembull shëndetësinë
Përmes një postimi në “Facebook”, lideri i PD shkruan se Shqipëria investon më pak se çdo vend tjetër për kujdesin shëndetësor dhe se numri i mjekëve për frymë në Shqipëri është më i ulëti. Sipas tij, kjo është arsyeja pse pagat e mjekëve që tashme po luftojnë në vijën e parë kundër pandemisë, janë më të ultat.
“Ata që e vuajnë këtë në kurrizin e tyre janë shqiptarët, të cilët paguajnë fatura të shtrenjta për ilaçet dhe trajtimin mjekësor. Nuk ka pse të vazhdohet kështu. Ne mund dhe duhet të investojmë më shumë në shëndetësi. Ne mund ti paguajmë më mirë mjekët dhe infermierët tanë dhe mund të shtojmë numrin e tyre. Ne mund të rimbursojmë më shumë për ilaçet dhe ti bëjmë të përballueshme për të gjithë. Të gjitha këto mund të bëhen. Për 7 vite Rama i la në baltë shqiptarët me premtime të pambajtura si ai për shëndetësinë falas. Boll më. Nuk mund të vazhdohet më kështu. Bashkë do ta largojmë të keqen dhe do të sjellim ndryshim dhe shpresë të re për Shqipërinë.”
