Ministria e Mbrojtjes njofton se gjatë 24 orëve të fundit janë raportuar 20 vatra zjarri në vend, prej të cilave 9 vijojnë aktive, ndërsa një tjetër është nën monitorim.
Në terren janë angazhuar 235 forca operacionale dhe 33 automjete zjarrfikëse, të mbështetura nga 140 efektivë të Forcave të Armatosura, 3 helikopterë dhe 2 avionë Air Tractor.
Vatrat kryesore
-Gojan–Gjegjan, Pukë: Situata mbetet problematike për shkak të erës së fortë dhe terrenit të vështirë. Forcat janë përqendruar në mbrojtjen e banesave, ndërsa banorët janë evakuuar. Operacioni mbështetet nga 40 efektivë të FA-së dhe 3 helikopterë.
-Mal Milot, Kurbin: Zjarri vijon të jetë aktiv, por për momentin rreziku për banesat është eliminuar. Në terren janë forca zjarrfikëse, ushtarake dhe bashkiake.
-Dajt, Tiranë: Vatra është riaktivizuar, por aktualisht nuk paraqet rrezik për zonat e banuara. Në operacion është angazhuar edhe një helikopter.
-Dukat, Vlorë: Zjarri në zonën e Shatës është zgjeruar gjatë natës drejt malit. Në terren ndodhen forcat vendore, 40 efektivë të FA-së dhe dy avionë Air Tractor. Banesat nuk rrezikohen.
-Ballaxhiaj, Memaliaj: Zjarri është nën kontroll dhe larg zonave të banuara. Në operacion janë angazhuar zjarrfikës, policia dhe vullnetarë, ndërsa disa banorë janë evakuuar.
Vatra aktive raportohen gjithashtu në Kalivaç, Shtuf, Gjorm të Sipërm dhe Hotolisht, ndërsa zjarri në Lufaj, Mirditë, është nën kontroll dhe monitorim.
Agjencia Kombëtare e Mbrojtjes Civile vijon monitorimin e situatës në të gjithë territorin, në koordinim me prefekturat, bashkitë dhe strukturat e Mbrojtjes Civile.
Prioriteti i operacioneve mbetet mbrojtja e jetës së qytetarëve, banesave dhe pasurisë, ndërsa kapacitetet operacionale vijojnë të jenë në gatishmëri për ndërhyrje.
