Ndryshimet e fundit në buxhet sollën debate në Komisionin e Ligjeve mes anëtarëve të opozitës dhe Ministrisë së Financave. Sipas deputetëve demokratë, ndryshimet nuk pasqyronin një situatë urgjente, siç parashikon Kushtetuta për miratimin e një akti normativ.
“Cilat nga këto çështje që sillni ju janë urgjente? Duhet që urgjenca të jetë objektive dhe jo oportunitet politik. Si ka mundësi që ju nuk arsyetoni se çfarë ju erdhi urgjente në qeverisje? Na rezulton që Onkologjiku del dhe kërkon donacione në vlerën e 4 milionë dollarëve dhe ju nuk e keni parë këtë gjë”, tha deputeti demokrat Oerd Bylykbashi.
Për kreun e Financave, ndryshime u realizuan pasi koha nuk priste dhe se të ardhurat për 6-mujorin e parë të këtij viti ishin mbi parashikimet e Ministrisë.
“Nëse unë do të listoja urgjencat sipas prioriteteve, ato do të ishin: indeksimi i pensioneve, sigurimi i fondeve për mbrojtjen, pasi nga NATO është kërkuar rritja e financimit për këtë sektor. E treta, burimet financiare për disa strukturime në procesin e integrimit”, tha Petrit Mala, ministër i Financave.
Ndërhyrjet në buxhet, të miratuara me vendim të Këshillit të Ministrave më 30 qershor, parashikojnë indeksimin e pensioneve, dyfishimin e pagesës mujore për fëmijët me aftësi të kufizuara, rritje të fondit për barnat onkologjike, si dhe 10.3 miliardë lekë shtesë për Ministrinë e Mbrojtjes.
