Shpallet fajtor Plaurent Dervishaj dhe Julian Meçe për tentativën e ekzekutimit të ish-prokurorit Arjan Ndoja. Gjykata e Posaçme e dënoi Dervishajn me burgim të përjetshëm, ndërsa Meçen me 35 vite heqje lirie, duke pranuar kështu kërkesën e Prokurorisë së Posaçme, që në këtë çështje u përfaqësua nga Adnan Xholi.
Më 1 nëntor 2019, te mbikalimi i Shkozetit, u qëllua me breshëri automatiku ndaj automjetit me të cilin udhëtonte ish-magjistrati Ndoja, së bashku me Aleksandër Lahon, që njihet si “Rrumi i Shijakut”. Nga atentati mbeti i vdekur shoferi i prokurorit, Andi Maloku. Në sallën e gjyqit, i ati i tij tregoi se ai ishte punësuar vetëm një muaj më parë, ndërsa vetë Arjan Ndoja shprehu ngushëllimet e tij për djalin 24-vjeçar që ndërroi jetë disa ditë pas ngjarjes.
Në rrëfimin e tij për togat e zeza të Gjykatës së Posaçme, tentativën për vrasje Arjan Ndoja e lidhi me profesionin e tij si prokuror. Më 6 maj 2022, ai u shkarkua nga Vetingu pasi ngeli në kriterin e pastërtisë së figurës. Atentati ndaj tij u zbardh nga rënia e SKY ECC, ku u provua ekzistenca e krimit të organizuar.
Me vendim të formës së prerë janë dënuar më herët Redjan Rraja me burgim të përjetshëm, Arjol Halilaj me 35 vite, Ramazan Rraja me 6 vite burg, 5.4 vite është dënuar Genti Ndërjaku, me 4.8 Bashkim Haxhia dhe Endrit Sinani, si dhe me 4 vite e 4 muaj Julian Pjetri.
/vizionplus.tv
