Drejtori i Përgjithshëm i Policisë së Shtetit, Skënder Hita, prezantoi planin e masave për garantimin e sigurisë gjatë sezonit turistik 2026, duke theksuar se menaxhimi i fluksit të turistëve mbetet një nga prioritetet kryesore të institucionit.
Sipas Hitës, Shqipëria po përjeton një nga vitet më të suksesshme në turizëm, me miliona vizitorë që zgjedhin vendin jo vetëm për bukuritë natyrore dhe trashëgiminë kulturore, por edhe sepse e konsiderojnë një destinacion të sigurt dhe mikpritës. Ai nënvizoi se ky sukses sjell edhe përgjegjësi më të madhe për institucionet e sigurisë.
Kreu i Policisë bëri të ditur se efektivët do të jenë të angazhuar në të gjithë territorin, ndërsa Policia Kufitare dhe Policia Rrugore do të ofrojnë shërbim maksimal, duke qenë kontakti i parë i turistëve me vendin. Ai kërkoi që uniformat blu të përfaqësojnë jo vetëm autoritetin e ligjit, por edhe kulturën e mikpritjes shqiptare.
“Për Policinë e Shtetit, menaxhimi i sezonit turistik mbetet prioritet absolut dhe shoqërohet me një angazhim të shtuar operacional në të gjithë territorin.
Policia Kufitare dhe më pas Policia Rrugore janë kontaktet e para që një vizitor krijon në vendin tonë. Uniforma jonë duhet të përfaqësojë autoritetin e ligjit, por njëkohësisht edhe mikpritjen, integrimin dhe mirësjelljen, si vlera të spikatura të shoqërisë shqiptare. Patrullimet shtrihen gjatë gjithë vijës bregdetare, në bashkëpunim me Rojën Bregdetare. Ndryshe nga vitet e tjera, këtë sezon, njësia policore detare do mbështet në mënyrë të integruar edhe nga ajri, me monitorim nga ajri, me monitorim përmes dronit për të garantuar një kontroll më gjithëpërfshirës të territorit,. Theksoj me vendosmëri se nuk do të tolerohet asnjë lloj shkelje për mjete lundruese që rriskojnë jetën e pushuesve. Kontrollet ndaj mjeteve lundruese, ndaj motorëve të ujit, skafe dhe anije turistike do jenë të pandërprera dhe të rrepta”, tha ai.
/vizionplus.tv
