E hënë, 16 Nëntor 2026 Lajme Ora 12:00 dhe Moti deri në 12:20 Në vijim ora 12:20: Trashëgimtari Halef Reklamo Kontakt Karriera
Vizion Plus
Sport

Sukses në fushë dhe në financa, UEFA shpërblen Shqipërinë

Kombëtarja shqiptare nuk ka fituar vetëm në aspektin sportiv nga aventura në Ligën e Kombeve, por edhe në atë financiar. Suksesi i kuqezinjve në Grupin C1 i ka sjellë Federatës Shqiptare të Futbollit të ardhura që arrijnë në të paktën 2.4 milionë euro nga UEFA.

Sipas skemës së shpërblimeve të kompeticionit, çdo federatë pjesëmarrëse në Ligën C përfiton 1.2 milionë euro si pagesë bazë për pjesëmarrjen dhe shpenzimet administrative. Ndërkohë, një tjetër bonus prej 1.2 milionë eurosh u akordohet skuadrave që arrijnë të fitojnë grupin e tyre.

Shqipëria i plotësoi të dy kushtet, duke e mbyllur këtë edicion në vendin e parë të Grupit C1.

Kuqezinjtë, të drejtuar nga trajneri Rolando Maran, siguruan triumfin përfundimtar pas fitores 0-2 ndaj Bjellorusisë në Hungari. Me këtë rezultat, përfaqësuesja shqiptare e mbylli garën me 15 pikë, duke regjistruar pesë fitore dhe vetëm një humbje në gjashtë takime.

Reklamë

Bilanci ishte gjithashtu pozitiv edhe në repartin ofensiv dhe atë mbrojtës: Shqipëria shënoi 12 gola dhe pësoi vetëm 3.

Përveç përfitimit financiar, vendi i parë i siguroi Shqipërisë edhe ngjitjen në Ligën B për edicionin e ardhshëm të Ligës së Kombeve. Një sukses që i jep Kombëtares mundësinë të përballet me kundërshtarë të një niveli më të lartë në vazhdim.

Kështu, aventura në këtë kompeticion rezulton e suksesshme në çdo aspekt për futbollin shqiptar: rezultatet në fushë, ngjitja në një ligë më të fortë dhe miliona euro të arkëtuara nga UEFA.

Vazhdo të lexosh

Reklamë

Lini një koment

Me respekt — komentet moderohen nga redaksia.
Nuk publikohet kurrë.