Europa po përballet me një nga valët më të rënda të të nxehtit të viteve të fundit, me temperatura rekord, viktima në rritje, ndërsa autoritetet janë në alarm në dhjetëra vende.
Sipas raportimeve të mediave ndërkombëtare, mbi 100 milionë europianë janë ekspozuar ndaj temperaturave që tejkalojnë 35 gradë Celsius, ndërsa në shumë zona të Francës, Spanjës, Italisë, Gjermanisë, Britanisë së Madhe dhe Zvicrës termometri ka kaluar kufirin e 40 gradëve.
Bilanci i viktimave vijon të rëndohet. Në Spanjë, sistemi kombëtar i monitorimit të vdekshmërisë ka lidhur mbi 200 vdekje me temperaturat ekstreme vetëm gjatë ditëve të fundit.
Në Francë janë regjistruar viktima nga goditja e të nxehtit, ndërsa dhjetëra persona kanë humbur jetën edhe nga mbytjet, teksa kërkonin freski në lumenj, liqene dhe dete. Në Britaninë e Madhe, shërbimet e urgjencës raportojnë numrin më të lartë ndonjëherë të rasteve kritike të lidhura me vapën.
Temperaturat rekord kanë paralizuar edhe jetën e përditshme. Mijëra shkolla janë mbyllur ose kanë reduktuar orarin e mësimit në Francë dhe Britani, ndërsa rrjetet energjetike dhe transporti po përballen me vështirësi për shkak të konsumit të lartë dhe mbingarkesës së infrastrukturës nga nxehtësia. Në Francë, dhjetëra mijëra familje kanë mbetur pa energji elektrike, ndërsa autoritetet kanë vendosur kufizime të reja për aktivitetet në ambiente të hapura.
Shkencëtarët paralajmërojnë se ndryshimet klimatike po i bëjnë episode të tilla gjithnjë e më të shpeshta, më të gjata dhe më intensive. Parashikimet tregojnë se temperaturat ekstreme do të vazhdojnë edhe në ditët në vijim, me autoritetet që u bëjnë thirrje qytetarëve të shmangin ekspozimin në diell gjatë orëve të pikut, të konsumojnë sa më shumë lëngje dhe të tregojnë kujdes të veçantë për të moshuarit, fëmijët dhe personat me probleme shëndetësore.
/vizionplus.tv
