Parada ushtarake e 9 Majit në Rusi pritet të zhvillohet këtë vit pa tanke dhe sisteme raketore, për herë të parë pas dy dekadash. Autoritetet ruse kanë rritur ndjeshëm masat e sigurisë, ndërsa priten edhe kufizime në komunikime, përfshirë ndërprerje të mundshme të shërbimeve SMS.
Presidenti i Ukrainës, Volodymyr Zelensky, la të hapur mundësinë që dronë ukrainas të dërgohen drejt Moskës në atë ditë. Duke folur në një samit ndërkombëtar, ai tha se Rusia nuk do të shfaqë pajisje ushtarake në paradë dhe se kjo lidhet me frikën nga sulme të mundshme ajrore.
“Kjo tregon shumë. Ata kanë frikë se dronët mund të fluturojnë mbi Sheshin e Kuq”, u shpreh Zelensky, duke shtuar se kjo situatë tregon dobësi të Rusisë në këtë moment.
Vendimi për të mos përfshirë mjete të rënda ushtarake në paradë lidhet me rritjen e rrezikut për sigurinë, katër vite pas nisjes së luftës në Ukrainë.
Ndërkohë, Ukraina ka intensifikuar përdorimin e dronëve për të goditur objektiva në thellësi të territorit rus. Së fundmi, janë raportuar sulme ndaj infrastrukturës energjetike në rajonin e Detit të Zi, si dhe një goditje pranë Moskës pa viktima.
Nga ana tjetër, presidenti rus Vladimir Putin ka propozuar një armëpushim njëditor më 9 Maj, por kjo është refuzuar nga Kievi, i cili kërkon një ndërprerje më të gjatë të luftimeve.
Në prag të paradës, autoritetet ruse kanë dislokuar sisteme shtesë të mbrojtjes ajrore në Moskë. Po ashtu, janë vendosur kufizime në rrjetet celulare dhe komunikimet satelitore, ndërsa mediat raportojnë se shërbimet SMS mund të ndërpriten nga 5 deri më 9 maj.
