Jay Clayton është betuar këtë të hënë (3 gusht) si Drejtori i ri i Inteligjencës Kombëtare (DNI) i Shteteve të Bashkuara, pas një seance të tensionuar konfirmimi në Senat, gjatë së cilës refuzoi të pranonte qartë se presidenti Donald Trump kishte humbur zgjedhjet presidenciale të vitit 2020.
Clayton zëvendëson Tulsi Gabbard, e cila dha dorëheqjen në qershor, pas një mandati të shkurtër të shoqëruar me përplasje të vazhdueshme me demokratët në Kongres. Ata e akuzonin se promovonte axhendën politike të Trump dhe përhapte pretendime të hedhura poshtë për manipulim të zgjedhjeve.
“Nga sot, siguria dhe mbrojtja e popullit amerikan do të jetë prioriteti ynë. Do të punojmë për të garantuar që qytetarët amerikanë të kenë besim të plotë te Komuniteti i Inteligjencës përmes mbikëqyrjes së duhur, transparencës dhe llogaridhënies”, thuhet në deklaratën e Clayton, të publikuar nga Zyra e Drejtorit të Inteligjencës Kombëtare.
Ai shtoi se kjo përfshin edhe garantimin që puna jetike e Komunitetit të Inteligjencës “të mos përdoret kurrë për motive politike”, duke përdorur një shprehje që Trump dhe aleatët e tij e kanë përdorur shpesh për të pretenduar se administratat e mëparshme kanë abuzuar me institucionet për ta shënjestruar atë.
Javën e kaluar, senatorët republikanë miratuan emërimin e Clayton, pavarësisht kundërshtimeve të demokratëve, të cilët e kritikuan vazhdimisht për refuzimin e tij për të pranuar se Donald Trump u mund nga Joe Biden në zgjedhjet presidenciale të vitit 2020.
Clayton, i cili më parë ka shërbyer si prokuror i Distriktit Jugor të Nju Jorkut, do të mbikëqyrë tashmë 18 agjenci të inteligjencës amerikane.
