Reagime të shumta ndërkombëtare kanë shoqëruar arritjen e armëpushimit 10-ditor mes Izraelit dhe Libanit, i cili synon uljen e tensioneve në një nga zonat më të paqëndrueshme të Lindjes së Mesme.
Pas SHBA-ve që kanë përshëndetur marrëveshjen, duke e cilësuar atë si një hap të rëndësishëm drejt stabilitetit në rajon, një reagim erdhi edhe nga kryeministri pakestinez.
Lexo edhe :
Related Posts
“Përshëndes njoftimin e një armëpushimi në Liban, të lehtësuar nëpërmjet përpjekjeve të guximshme dhe të zgjuara diplomatike të udhëhequra nga Presidenti Donald Trump, dhe shpreh shpresën se kjo do të hapë rrugën për një paqe të qëndrueshme”, tha kryeministri i Pakistanit.
Edhe Bashkimi Evropian e ka mirëpritur armëpushimin, duke bërë thirrje për përmbajtje dhe zbatim të plotë të marrëveshjes.
“Armëpushimi 10-ditor midis Izraelit dhe Libanit është një lajm i shkëlqyer. Tani duhet të zbatohet dhe verifikohet në terren. Është thelbësore që Izraeli dhe Libani të angazhohen në negociata kuptimplotë që japin rezultate konkrete, për hir të popujve të tyre dhe perspektivën e një paqeje të qëndrueshme. BE-ja do të vazhdojë të mbështesë Libanin”, tha Antonio Costa, President i Këshillit Evropian.
Një deklaratë ka ardhur edhe nga presidenti francez Emmanuel Macron.
“Unë e mbështes plotësisht armëpushimin midis Hezbollahut dhe Izraelit, siç u njoftua dje nga Presidenti Trump. Gjithashtu shpreh shqetësimin tim se ai mund të jetë dëmtuar tashmë nga vazhdimi i operacioneve ushtarake. Bëj thirrje për sigurinë e popullatave civile në të dyja anët e kufirit midis Libanit dhe Izraelit”, tha Macron.
Nga ana tjetër, Kombet e Bashkuara kanë kërkuar që armëpushimi të jetë i qëndrueshëm dhe të shoqërohet me hapa konkretë drejt një zgjidhjeje afatgjatë. OKB ka paralajmëruar se situata mbetet e brishtë dhe çdo shkelje mund të rrezikojë stabilitetin e arritur.
Ndërkohë, vende të ndryshme të rajonit dhe aktorë të tjerë ndërkombëtarë e kanë cilësuar marrëveshjen si një mundësi për të shmangur një konflikt më të gjerë.
Pavarësisht optimizmit, komuniteti ndërkombëtar mbetet i kujdesshëm, duke theksuar se respektimi i armëpushimit në terren do të jetë vendimtar për vazhdimësinë e paqes.
