Kryeparlamentari i Maqedonisë së Veriut, Talat Xhaferi, i ka dërguar këtë të hënë një letër falenderimi homologut të tij shqiptar, Gramoz Ruçi. Ky i fundit e uroi disa ditë më parë për rizgjedhjen në krye të Kuvendit të Maqedonisë së Veriut.
Në letrën e tij, Xhaferi nënvizoi se me ndihmën e Shiqpërisë, shqiptarët në Maqedoninë e Veriut po kthehen në faktor të rëndësishëm të demokratizimit dhe europianizimit të vendit, ndërsa iu përgjigj me kënaqësi ftesës së Ruçit për t’u takuar në Tiranë.
“Përkrahja juaj nuk na ka munguar asnjëherë dhe me ndihmën tuaj, shqiptarët e Maqedonisë së Veriut, ngadalë por të sigurt, po bëhen faktorë të rëndësishëm në fuqizimin e shtetit demokratik dhe europianizimin e vendit. Falë bashkëpunimit të shkëlqyeshëm gjatë mandati të kaluar, arritëm ta fuqizojmë lidhjen Tiranë-Shkup dhe ky bashkëpunim nuk do të mungojë as mandatin e ardhshëm katërvjeçar. Ju falenderoj për ftesën dhe shpresoj të shihemi së shpejti në Tiranë”, shkruan Talat Xhaferi.
