Unioni i Gjyqtarëve të Republikës së Shqipërisë, Shoqata Kombëtare e Gjyqtarëve dhe Shoqata e Prokurorëve kanë reaguar lidhur me zbatimin e vendimit të Gjykatës Kushtetuese për pagat e magjistratëve, duke deklaruar se afati i lënë Kuvendit për ndërhyrje ligjore ka përfunduar pa miratimin e ndryshimeve përkatëse.
Në deklaratën e përbashkët, shoqatat bëjnë të ditur se Unioni i Gjyqtarëve kishte paraqitur kërkesë në Gjykatën Kushtetuese për shfuqizimin e disa dispozitave të ligjit nr. 33/2023, që ndryshonte ligjin për statusin e gjyqtarëve dhe prokurorëve. Kërkesës iu bashkua edhe Shoqata Kombëtare e Gjyqtarëve.
Sipas tyre, Gjykata Kushtetuese, me vendimin nr. 15, datë 17.02.2026, pranoi kërkesën dhe vlerësoi se ndryshimet e miratuara më herët nga Kuvendi cenonin statusin financiar të magjistratëve përmes një uljeje të fshehur të pagës.
Shoqatat theksojnë se Gjykata Kushtetuese kishte përcaktuar kriteret për hartimin e një norme të re për pagat dhe i kishte lënë Kuvendit afat deri më 31 korrik 2026 për të miratuar ndryshimet e nevojshme. Në rast mosveprimi, Gjykata kishte parashikuar zbatimin e një formule pagash të lidhur me funksionarin e administratës së lartë publike, sipas vendimit nr. 35/2022.
Sipas reagimit, duke nisur nga 1 gushti 2026, pagat e magjistratëve duhet të përllogariten mbi bazën e kësaj formule, ndërsa zbatimi do të ketë efekt prapaveprues për periudhën 1 prill 2023 – 31 korrik 2026.
Shoqatat e magjistratëve deklarojnë se do të ndjekin zbatimin e plotë të vendimit të Gjykatës Kushtetuese dhe u bëjnë thirrje institucioneve dhe zyrtarëve përgjegjës të respektojnë detyrimet kushtetuese që burojnë nga neni 132, pika 1 e Kushtetutës së Republikës së Shqipërisë. Ato shprehen gjithashtu të gatshme për të kontribuar në mënyrë konstruktive në procesin e zbatimit të vendimit.
/vizionplus.tv
