Rritja e menjëhershme e nivelit të ujit në Drinin e Zi, shpëtohen 7 qytetarë të bllokuar në Bulqizë
Shtatë qytetarë, të cilët kishin mbetur të bllokuar në rrjedhën e lumit Drini i Zi, në zonën e njohur si “Ura e Gjoricës” në Bulqizë, janë shpëtuar falë ndërhyrjes së shpejtë të Policisë dhe shërbimeve të emergjencës.
Sipas njoftimit të Policisë, shërbimet e Komisariatit të Policisë Bulqizë reaguan menjëherë pasi morën njoftimin nga një qytetar, i cili kërkoi ndihmë pasi ai dhe gjashtë familjarë të tij kishin mbetur të izoluar si pasojë e rritjes së menjëhershme të nivelit të ujit në lumin Drini i Zi.
Në operacion u angazhuan edhe shërbimet e Emergjencave Civile të Prefekturës Dibër, si dhe efektivët e shërbimit zjarrfikës. Pas organizimit të ndërhyrjes, të shtatë qytetarët u nxorën në mënyrë të sigurt nga rrjedha e lumit me gomone.
Fatmirësisht, të gjithë janë në gjendje të mirë shëndetësore.
Policia e Dibrës apelon ndaj qytetarëve që të tregojnë kujdes maksimal gjatë qëndrimit pranë lumenjve dhe zonave ujore, veçanërisht në rastet kur niveli i ujit mund të ndryshojë papritur. Gjithashtu, fton qytetarët të njoftojnë menjëherë Policinë për çdo situatë emergjente në numrin pa pagesë 112.
/vizionplus.tv
