Policia ka dhënë detaje të reja lidhur me ngjarjen e raportuar mbrëmjen e djeshme në zonën detare përballë Palasës, ku u sinjalizua se nga një mjet lundrues dyshohej se ishin qëlluar të shtëna me armë zjarri në ajër.
Sipas njoftimit zyrtar, menjëherë pas marrjes së informacionit, shërbimet e Policisë Kufitare, Njësia Policore Detare, Delta Forcë, Komisariati i Policisë Himarë, Stacioni i Policisë Dhërmi, si dhe grupet e Forcës Kombëtare të Sigurisë (FKS), organizuan ndjekjen e jahtit nga deti dhe toka, pasi ai po lëvizte në drejtim të Himarës.
Falë reagimit të shpejtë, efektivët arritën të ndalonin jahtin në det, përballë Himarës, dhe të shoqëronin për veprime të mëtejshme katër personat që ndodheshin në bord: shtetasit B. C., 31 vjeç, L. H., 31 vjeç, A. K., 49 vjeç dhe P. Gj., 60 vjeç.
Gjatë kontrolleve të ushtruara në jaht dhe ndaj personave të shoqëruar, Policia nuk konstatoi asnjë armë apo send tjetër të kundërligjshëm. Ndërkohë, grupi hetimor ka marrë deklarime nga personat që kanë dijeni për ngjarjen dhe ka kryer ekspertime për të përcaktuar faktorët plotësues të qitjes.
Nën drejtimin e Prokurorisë, hetimet vijojnë për zbardhjen e plotë të rrethanave të rastit, verifikimin e informacionit të marrë dhe dokumentimin ligjor të ngjarjes. Materialet procedurale do t’i referohen Prokurorisë pranë Gjykatës së Shkallës së Parë të Juridiksionit të Përgjithshëm Vlorë për veprime të mëtejshme.
/vizionplus.tv
