Lëvizja Socialiste për Integrim përmes kryetarit të grupit parlamentar, Petrit Vasili, një ditë pas denoncimit të bërë nga PD-ja, ka kërkuar shkarkimin e kryeprokurores Arta Marku me pretendimin se ka shkelur ligjin duke propozuar prokurorin Bujar Shehi për Këshillin e lartë të Prokurorisë.
Në deklaratën e tij Vasilit, është shprehur se kryeprokurorja nuk ka pritur përgjgjen e Autoritetit të hapjes së dosjeve për këtë prokuror, duke e lënë Këshillin e Lartë të Prokurorisë në duart e njerëzve pa integritet
“Arta Marku ka shpërdoruar haptas dhe qartë një shpërdorim detyre nga më të rëndit, që ka prodhuar pasoja nga më katastrofike, për shkak se ndërtimi i institucioneve të reja të drejtësisë sot është ndërtuar nga njerëz, integriteti i të cilëve nuk është verifikuar. Ajo për të cilën Reforma në Drejtësi u ngrit, pra për të krijuar filtra të fortë, të pakalueshëm, të pakapërcyeshëm për kandidaturat e diskutueshme, me integritet të ulët etj, sot rezulton filtra të çara, sepse Prokurorja që jo rastësisht u zgjodh me 69 vota, pra për tu kapur nga mazhoranca, rezultoi që u vu në shërbim të kapjes dhe sot dokumentat, verifikimi zyrtar i përcaktuar qartë në ligj dhe në Kushtetutën e Vendit janë sot vetëm një leckë pavlerë në duart e një Kryeprokurore tërësisht të kapur. Pra të nderuar qytetarë, i drejtohet në datën 26 Tetor me një shkresë Autoritetit të Dosjeve, nuk pret fare përgjigjen e tyre. Autoriteti i përgjigjet me datë 22 Janar, pak ditë përpara, por kjo zonjë nuk pret fare vetëm 5 ditë pasi i çon shkresën Autoritetit, ia dërgon kandidatin si të përshtatshëm dhe ai zgjidhet, ndërkohë që mbas 3 muajsh vjen një shkresë, e cila rezulton me probleme serioze për këtë kandidat, i cili tashmë gëzon mandatin e KLP-së. Shkarkimi i menjëhershëm i Arta Markut. Duhet të ishte një përgjigje jo vetëm për respektimin e ligjit, por dhe për qytetarët, të cilët përfundimisht janë zhgënjyer, nuk mund të besojnë më kurrë tek kjo Reformë në Drejtësi, e cila rezulton më difektoze, më pamoral dhe më e keqe se ajo që lamë pas. ”
Gjithashtu në fjalën e tij Vasili ka kërkuar edhe ndjekjen penale të Arta Markut duke u shprehur se sa më shumë të qëndrojë prokurorja e përgjithshme në detyrë, aq më shumë kjo do të konsiderohet atentat ndaj drejtësisë.
