Ushtarët e Koresë së Veriut janë përleshur me trupat ukrainase për herë të parë, kanë zbuluar zyrtarët e lartë të Ukrainës.
Në një intervistë me transmetuesin koreano-jugor KBS, ministri ukrainas i Mbrojtjes Rustem Umerov tha se një “grup i vogël” ushtarësh koreano-veriorë u sulmuan, raporton BBC.
Udhëheqësi i Ukrainës, Volodymyr Zelensky, i cili më herët kishte dënuar mungesën e përgjigjes së Perëndimit ndaj trupave të Koresë së Veriut, tha se “betejat e para me Korenë e Veriut hapin një kapitull të ri jostabiliteti në botë”.
Megjithatë, Seuli tha se “nuk beson se [trupat nga të dyja palët] janë përfshirë në luftime të drejtpërdrejta”, por se ka pasur një “incident” që përfshin një numër të vogël ushtarësh koreano-veriorë “afër vijës së frontit”.
Ukraina thotë se rreth 11,000 ushtarë të Koresë së Veriut ishin në rajonin kufitar Kursk, ku trupat ukrainase kanë një bazë.
Javët e fundit, inteligjenca koreano-jugore dhe amerikane, si dhe NATO-ja kanë thënë se kanë parë prova të përfshirjes së trupave të Koresë së Veriut në luftën e Rusisë.
Por Moska dhe Pheniani deri më tani nuk i janë përgjigjur drejtpërdrejt akuzave.
Zyrtari i lartë ukrainas kundër dezinformimit, Andriy Kovalenko tha fillimisht në një postim në Telegram të hënën se “njësitë e para ushtarake të Koresë së Veriut… [kishin] sulmuar tashmë në Kursk”.
Në një intervistë me transmetuesin koreano-jugor KBS, Rustem Umerov e konfirmoi këtë, duke thënë se ai pret që një “numër i konsiderueshëm” i trupave të Koresë së Veriut të angazhohen në luftime, megjithëse ai shtoi se “deri tani ishin vetëm kontakte të vogla, jo angazhim në shkallë të plotë.”
Shumica prej tyre janë ende në trajnime, shtoi ai.
“Ata janë të veshur me uniforma ruse, po kalojnë stërvitje taktike dhe janë duke u dislokuar nën komanda të ndryshme të ushtrisë ruse në vijat e frontit”, tha Umerov.
Ai tha se kishte të ngjarë që pesë njësi, secila e përbërë nga rreth 3,000 ushtarë, do të vendoseshin në të gjithë fushën e betejës.
Ai nuk përmendi nëse ka viktima.
Raportimet për një lëvizje të tillë nga Koreja e Veriut kanë alarmuar edhe Jugun, duke rritur tensionet mes dy palëve.
Në fund të muajit të kaluar, Seuli kishte thirrur ambasadorin rus, duke kërkuar “tërheqjen e menjëhershme” të trupave të Koresë së Veriut nga Ukraina. Ajo paralajmëroi gjithashtu se po konsideronte furnizimin e drejtpërdrejtë të armëve për Ukrainën.
Analistët kanë thënë se Pheniani mund të paguhet ose mund t’i jepet akses në teknologjinë ushtarake ruse në këmbim të trupave.
Të mërkurën, ligjvënësit rusë do të votojnë për të ratifikuar një traktat të mbrojtjes reciproke me Korenë e Veriut, e propozuar për herë të parë gjatë vizitës të presidentit rus Vladimir Putin në Phenian në qershor.
Ai zotohet se Rusia dhe Koreja e Veriut do të ndihmojnë njëra-tjetrën në rast të “agresionit” kundër secilit vend./vizionplus.tv
