Eksperti i sigurisë, Gert Metani, i ftuar këtë të martë në “Quo Vadis” të moderatores Pranvera Borakaj në Vizion Plus, komentoi atë që po ndodh në Tiranë sot, ku po protestohet për Zvërnecin.
Metani tha se nuk duhet hetuar vetëm ai që goditi me grusht qytetarin në Zvërnec, por edhe porositësi, i cili ende nuk dihet se kush është.
Pjesë nga biseda:
Borakaj: Dhuna duket sikur ishte ajo shkëndija për të pasur këtë revoltë popullore. Çfarë pamë?
Metani: Pamë një ambient të rrethuar, pamë policë të shërbimit privat me uniformë dhe me mjetet e tyre, pamë edhe Policinë e Shtetit. Nga ana tjetër, brenda rrethimit, një grup me ata kapuçët e zinj, si ata bodyguard-ët që shoqërojnë persona problematikë në vendin tonë. I gjithë problemi lindi nga ai grusht i famshëm, i papranueshëm.
Dëmi më i madh në një pronë shtetërore ka qenë më 21 janar, kur 4 persona, në një tentativë për t’u futur në një pronë publike, u vranë. Nga 21 janari deri më sot, gazi lotsjellës përdoret në masë, por nuk vret njerëz.
Këta njerëz që janë paguar nga nënkontraktori aty, jo të gjithë ishin të regjistruar te kjo kompani “Major Security”, në pronësi të një zonje. Personi që goditi dhe që u arrestua ishte pronari de facto; de jure ishte personi i lidhur me të.
Borakaj: Çfarë kuptimi ka që ta fusësh brenda dikë, pse s’e nxorën jashtë?
Metani: E gjithë çka ndodhi ishte dashakeqësi, dhunë. Personat që ishin për siguri aty tentuan ta qetësonin situatën. Policia mund të merrte masa. Besoj se nën presionin e biznesmenëve që kanë interes aty është kërkuar të mos ndërhyhet dhe të lihet situata në dorë të këtyre “kapuçëzinjve”. Të gjuash me gurë, të ofendosh me libër shtëpie – goditja është e patolerueshme. Ne nuk e tolerojmë këtë te forcat e policisë, jo më te një grup i paligjshëm.
Prandaj, për mendimin tim, hetimi i prokurorisë nuk duhet të ndalet vetëm te personi që goditi.
Borakaj: Gazetarja e Vizionit pyeti drejtorin pse patët këtë reagim për Zvërnecin dhe jo për Rrjollin?
Metani: Kam dyshimet e mia. Ata kanë pasur direktiva për të mos lejuar një situatë si Rrjolli, ku protestuesit futen, dhe këta “gangot” kanë marrë përsipër që të mos përsëritej Rrjolli. Duhet parë kush është porositësi.
