Prej tre ditësh në Tiranë protestohet për Zvërnecin, ku qytetarët kërkojnë anulimin e projektit. I pranishëm këtë mbrëmje në studion e “Quo Vadis” të moderatores Pranvera Borakaj në Vizion Plus, eksperti i ekonomisë Ergis Sefa deklaroi se qytetarët protestojnë për mungesë transparence.
Sipas tij, zyrtarisht nuk dihet se kush janë në të vërtetë përfituesit e projektit. Ndërkohë, Sefa vuri në dukje se protesta e zhgënjeu në disa pika, siç ishte pjesëmarrja e partive të vogla, por edhe thirrjet për varje apo sharjet dhe fyerjet.
Pjesë nga biseda:
Sefa: Ne, në fakt, investimet strategjike i kemi në fokus. Kemi shkelje të konventës, pasi duhej të kishte më shumë transparencë për këtë zhvillim ekonomik.
Borakaj: Kryeministri thotë se nuk ka ende një projekt?
Sefa: Investimi në tërësi është më i madhi privat deri më sot në Shqipëri. Kemi mungesë totale transparence. E dyta, ka mungesë në publik të një studimi për përfitimet. Vërtet thuhet se do të sjellë vende pune, por nuk thuhet si, çfarë dhe në çfarë mënyre. E treta, mënyra se si është strukturuar forma korporative është një mënyrë që lë hije dyshimi.
Borakaj: A kemi një ligj që detyron të tregohet pronari përfitues?
Sefa: Po, e kemi, por duke parë se TRUST-i është holandez, ata kanë një kriter që mund të lejojë edhe fshehjen. Ata që dalin janë të besuarit, kurse pronarët e vërtetë kanë një procedurë më të gjatë; legjislacioni i tyre e lejon. Por shteti shqiptar duhet të ishte më këmbëngulës.
Borakaj: Ne nuk i dimë përfituesit e vërtetë?
Sefa: Në letra zyrtarisht nuk e dimë kush është.
Borakaj: Koment për protestën?
Sefa: Ajo që më bëri përshtypje është se dolën të protestojnë për transparencë dhe mirëqeverisje, me një frymë më opozitare. Ajo që nuk më pëlqeu është përzierja e forcave më të vogla politike. E dyta, më e rëndësishmja, janë parullat me fyerje personale, apo thirrje për vdekje e varje, gjë që më duket absurde. Duhet të bëjmë një dallim për protestat për transparencë.
