Presidenti amerikan, Donald Trump është përfshirë në një stuhi politike që prej shkarkimit të drejtuesit të FBI, James Comey, një vendim, sipas tij, pa lidhje me hetimin e policisë federale mbi një bashkëpunim të mundshëm me Rusinë.
Sot, drejtori i përkohshëm i FBI, Andrew McCabe do të dëshmojë publikisht para komisionit të plotfuqishëm të shërbimit sekret të Senatit, një prej tre komisioneve të hetimit mbi ndërhyrjet ruse në fushatën presidenciale amerikane, paralelisht me një hetim të FBI.
Të zgjedhurit nga dy palet janë marrë në pyetje që prej të martës mbi motivet dhe kalendarin e shkarkimit. Opozita dyshon se Trump ka kërkuar të pengojë një hetim që njollos emrin e tij dhe shënjestron disa prej bashkëpunëtorëve të tij të afërt.
Shtëpia e Bardhë hodhi dje poshtë kërkesat e opozitës demokrate për të emëruar një prokuror special për hetimin, ashtu si gjatë skandaleve të Watergate apo sjelljet e Bill Clinton.
Investigimet e FBI, hapur vitin e kaluar, kanë në qendër të tyre piratimet ruse kundër kampit demokrat dhe një koordinim të mundshëm mes Moskës dhe anëtarëve të ekipit të fushatës së Trump.
Zëdhënësja e Shtëpisë së Bardhë, Sarah Huckabee Sanders deklaroi se shkarkimi nuk kishte asnjë lidhje me Rusinë dhe se kishte ardhur si pasojë e gabimeve dhe lëvizjeve të gabuara të drejtorit në hetimin mbi emailet e kandidates demokrate për zgjedhjet presidenciale, Hillary Clinton vitin e kaluar.
Sanders hodhi poshtë kërkesat për të emëruar një prokuror special mbi zërat për bashkëpunim me Rusinë.
“Ne nuk mendojmë se kjo është e nevojshme”, theksoi ajo.
Ajo siguroi se presidenca do të vazhdojë ndjekjen e hetimit të FBI dhe investigimet parlamentare.
Donald Trump ka justifikuar vendimin e tij me faktin se ai nuk e bënte mirë punën, është shumë e thjeshtë.
Presidenti amrerikan, Donald Trump priti shefin e diplomacisë ruse, Sergei Lavrov dhe e cilësoi si takim shumë shumë të mirë, takimin e parë me zyrtarin e lartë rus.
Sipas Lavrov, akuzat për ndërhyrje ruse në politikën e brendshme amerikane janë një iluzion.
Kremlini thekoi se shkarkimi i Comeyt ishte një çështje e brendshme amerikane dhe u shpreh se shpresonte që kjo nuk do të ndikonte në marrëdhëniet mes dy vendeve.
Comey, u shkroi një letër lamtumire kolegëve të tij, publikuar nga CNN: “mendoj që prej shumë kohësh se një president mund të shkarkojë një drejtor të FBI për çfarëdolloj arsye ose pa arsye. Nuk do të jap asnjë detaj mbi vendimin dhe mënyrën se si ai u aplikua. Shpresoj që dhe ju gjithashtu. U bë dhe gjithçka do të shkojë mirë për mua”.
“Mes Trump dhe Comeyt, mosmarrëveshjet u rritën që prej muajve kur hetimi i FBI u përshpejtua”, sipas disa mediave.
Në mars, Comey konfirmoi në Kongres ekszistencën e hetimit të FBI mbi informacionet për bashkëpunim me Rusinë dhe kundërshtoi Trump mbi vënien nën përgjim të Trump Tower nga ish-presidenti amerikan, Barack Obama (2009-2017).
