Ndërsa KQZ, foli për 21.6% të zgjedhësve që morën pjesë në procesin e 30 qershorit,Partia Demokratike deklaroi të tjera shifra. Përmes sekretarit të përgjithshëm Gazment Bardhi, PD thekson se pjesëmarrja faktike në votime është 534,528 persona ose 15.2% e votuesve.
“Ashtu siç e kemi bërë me dije gjatë gjithë ditës së sotme, Partia Demokratike e ka monitoruar në çdo qendër votimi numrin e pjesëmarrësve në votime. Shifrat reale të pjesëmarrësve në votime për çdo bashki, nuk janë shifrat e fryra, të manipuluara, në një operacion kriminal, nga Komisioni Qendror i Zgjedhjeve, nga 4 anëtarë të paligjshëm të Partisë Socialiste, në Komisionin Qendror të Zgjedhjeve. Kjo sjellje e KQZ-së, në këto votime moniste, e ka një shpjegim. Komisioni Qendror i Zgjedhjeve, me urdhër direkt të Edi Ramës, ishte i përfshirë në një operacion kriminal të manipulimit të shifrave të pjesëmarrjes. Procesverbali i orës 11.00 me 6% pjesëmarrje i KQZ, provon manipulimin kriminal, me dyfishimin në 12 të numrit të votuesve. Po presim që KQZ ta kryejë krimin deri në fund. Më pas do të bëjmë transparencën për pjesëmarrjen me pamje filmike.”-tha sekretari i përgjithshëm i PD Gazment Bardhi, gjatë një konference për shtyp.
