Nga Ervin Sina
Java e parë e Serisë A mbyllet sot në Tring me dy sfidat e fundit. Fillimisht, në orën 18:30 transmetohet përballja mes Udineses dhe Veronës, ndërsa më pas vëmendja përqendrohet në mbrëmje, në orën 20:45, me takimin Inter–Torino.
Zikaltërit duhet t’i përgjigjen Napolit, Juventusit dhe Romës, skuadra me pretendime, të cilat fituan sfidat e tyre të javës së parë.
Sonte në “San Siro” bën debutimin në sezonin e ri para publikut zikaltër edhe trajneri Kristjan Kivu, që zëvendëson Simone Inzagin.
Tekniku rumun nuk do të ketë në dispozicion Hakan Calhanoglu, të skualifikuar, si dhe talentin e ri italian, Pio Esposito. Në vend të turkut, është gati blerja e verës, kroati Sucic.
Në krahun tjetër, Torino është përforcuar ndjeshëm gjatë verës, sidomos në fazën ofensive, me emra si Simeone dhe Ngonge. Kristjan Asllani nuk do të mund të luajë kundër ish-skuadrës së vet, Interit, për shkak të mosplotësimit në kohë të dokumentacionit.
