Pronarët spanjollë të restoranteve, klubeve të natës u mblodhën në Madrid këtë të mërkurë për t’i kërkuar qeverisë ulje taksash dhe mbështetje për t’iu mbijetuar pasojave të shkaktuara nga pandemia e koronavirusit.
Ata mbanin në duar banderola me mbishkrime: “Gjashtë muaj të mbyllur. Ndihmë”; “Problemi nuk jemi ne”.
Klubet e natës në Madrid janë të mbyllura, ndërsa restorantet dhe baret lejohen të hapen e të qëndrojnë aktive vetëm me kapacitet të reduktuar.
Me një numër të ulët turistësh dhe klientësh, këto biznese po përgatiten për një vjeshtë dhe dimër të ashpër.
“Ne mund të mbijetojmë vetëm për një kohë të shkurtër, ndoshta dy ose tre muaj, nuk mendoj se mund të zgjasim më gjatë”, tha një protestues.
Ekonomia e Spanjës u tkurr me një rekord 18.5% në periudhën prill-qershor, rënia më e fortë mes vendeve anëtare të Bashkimit Evropian.
