Një avion që ishte nisur nga Selaniku drejt Memmingenit, u detyrua të kthehej në Aeroportin “Makedonia” të premten, pasi pësoi një defekt serioz në motor pak minuta pas ngritjes, njoftuan autoritetet greke.
Një copëz e shkëputur nga motori theu një nga xhamat e kabinës, duke lënduar pasagjerin që ishte ulur aty. Si masë parandaluese u aktivizuan maskat e oksigjenit, gjë që shkaktoi panik mes udhëtarëve. Pavarësisht dëmtimit të xhamit, nuk pati çarje apo dëmtim të trupit të avionit.
Ekuipazhi konstatoi problemin teksa avioni po fluturonte mbi Maqedoninë e Veriut dhe vendosi të kthehej në Selanik, pasi defekti në motor nuk mund të zgjidhej gjatë fluturimit.
Pasi pilotët shpallën gjendjen e emergjencës, në Aeroportin “Maqedonia” u aktivizuan procedurat standarde të sigurisë. Zjarrfikësit, ambulancat, policia dhe shërbimet e tjera të emergjencës u vendosën në gatishmëri. Avioni u ul pa probleme dhe më pas u zhvendos në një zonë të posaçme të aeroportit.
Katër pasagjerë u transportuan në spital për kontrolle mjekësore. Shumica u ekzaminuan dhe u lanë të lirë, ndërsa një person mbeti nën vëzhgim për analiza të mëtejshme. Ryanair siguroi një avion zëvendësues për të transportuar shumicën e pasagjerëve drejt destinacionit të tyre dhe për të përfunduar udhëtimin.
Në një deklaratë për mediat, kompania tha:
“Një fluturim nga Selaniku drejt Memmingenit u kthye në Selanik pak pas ngritjes, pasi një xham i kabinës u shkëput gjatë fluturimit. Avioni u ul normalisht dhe pasagjerët u kthyen në terminal. Një pasagjer kërkoi dhe mori ndihmë mjekësore në aeroportin e Selanikut. Për të minimizuar vonesat, u vu në dispozicion një avion zëvendësues, i cili u nis nga Selaniku në orën 09:53 sipas kohës lokale.”
Autoritetet përgjegjëse të aviacionit kanë nisur një hetim për të përcaktuar shkaqet e incidentit.
