Një 80-vjeçar nga Presicce-Acquarica, në provincën e Leçes, është dënuar me 3 vjet e 3 muaj burg për keqtrajtim në familje dhe plagosje, pasi u shpall fajtor për ushtrimin e dhunës sistematike ndaj bashkëshortes shqiptare dhe dy fëmijëve të saj.
Vendimi u mor nga Seksioni i Parë Penal i Gjykatës, i cili urdhëroi edhe ndalimin e të dënuarit nga ushtrimi i funksioneve publike për pesë vjet. Gjykata vendosi gjithashtu një dëmshpërblim paraprak prej 25 mijë eurosh për gruan dhe djalin e mitur, si dhe 10 mijë euro për vajzën madhore, ndërsa vlera përfundimtare do të përcaktohet në një proces civil. Prokuroria kishte kërkuar një dënim me gjashtë vjet burg.
Sipas hetimeve, i moshuari e kishte sjellë në Itali gruan shqiptare, shumë më të re në moshë, së bashku me dy fëmijët e saj nga një lidhje e mëparshme, duke i premtuar një jetë më të mirë dhe stabilitet ekonomik. Por, sipas akuzës, premtimet u shndërruan shpejt në një realitet të mbushur me dhunë, frikë dhe izolim.
Për rreth katër vjet, nga viti 2017 deri në maj 2021, familja jetoi nën kontroll të vazhdueshëm. Prokuroria provoi se burri ushtronte dhunë fizike dhe psikologjike, i fyente dhe i kërcënonte vazhdimisht, kufizonte lirinë e tyre dhe nuk i lejonte të bënin një jetë normale. Sipas dosjes hetimore, gruaja dhe fëmijët detyroheshin të zgjoheshin në orët e para të mëngjesit për të pastruar apartamente që jepeshin me qira, ndërsa fëmijëve u pengohej edhe ndjekja e rregullt e shkollës.
Mes episodeve më të rënda të dokumentuara është ai i tetorit 2017, kur djali, vetëm gjashtë vjeç në atë kohë, u godit me forcë dhe u përplas pas një kaloriferi, duke pësuar një plagë në kokë që kërkoi ndërhyrje urgjente në spitalin e Trikazes. Edhe vajza u bë disa herë objekt i dhunës, ndërsa në një rast u kërcënua në plazh, ku 80-vjeçari e ofendoi dhe e kanosi duke mbajtur në dorë një gur.
Sipas akuzës, situata u përkeqësua edhe më tej kur gruaja kërkoi t’i jepte fund marrëdhënies. Në një episod, burri dyshohet se e kapi nga fyti duke e kërcënuar me vdekje, ndërsa në një rast tjetër kërcënoi se do të vriste gruan dhe dy fëmijët e saj nëse nuk largoheshin nga shtëpia.
Hetimet nisën pasi gruaja dhe vajza iu drejtuan disa herë urgjencës së spitalit të Trikazes me dëmtime që ngritën dyshime për dhunë në familje. Verifikimet e mëvonshme zbuluan një histori të gjatë abuzimesh, kërcënimesh dhe kontrolli të vazhdueshëm, që përfundoi me dënimin e 80-vjeçarit.
/vizionplus.tv
