Projekti “Smart City” po shtrihet gradualisht në terren, ndërsa Policia e Shtetit po zgjeron përdorimin e teknologjisë për monitorimin e trafikut dhe evidentimin e shkeljeve. Ministri i Brendshëm, Besfort Lamallari, ka publikuar pamje nga kontrollet, ku shfaqen radarët, dronët dhe automjetet inteligjente në funksion të sigurisë rrugore.
Në një postim në rrjetet sociale, Lamallari thekson se rritja e numrit të turistëve dhe e qarkullimit të automjeteve shoqërohet me nevojën për masa më të forta për parandalimin e aksidenteve dhe garantimin e sigurisë në rrugë.
“Pas qytetarëve, aleati më i fortë i policisë është teknologjia”, shkruan ministri, duke shtuar se radarët, dronët dhe makinat inteligjente mundësojnë monitorim të vazhdueshëm të trafikut dhe evidentimin e shpejtësisë, shkeljeve dhe sjelljeve që rrezikojnë qytetarët.
Sipas Lamallarit, zbatimi i plotë i projektit “Smart City” do të sjellë një ndryshim të rëndësishëm në sigurinë rrugore dhe publike në Shqipëri.
Sistemi “Smart City parashikon vendosjen e më shumë se 5 mijë kamerave inteligjente, në 873 lokacione operative, në 24 qytete dhe 28 pika të kalimit kufitar. Teknologjia do të përdoret jo vetëm për monitorimin e trafikut, por edhe për identifikimin në kohë reale të situatave të rrezikshme.
Sipas ministrit, kamerat do të mund të evidentojnë të shtëna me armë, nxjerrjen e armëve të zjarrit apo thikave në ambiente publike, si dhe sjellje të dhunshme. Qëllimi është që këto të dhëna t’i mundësojnë Policisë reagim më të shpejtë ndaj situatave që kërcënojnë sigurinë publike.
/vizionplus.tv
