Një gjykatë siriane e dënoi të martën me vdekje liderin e rrëzuar Bashar al-Assad, pas një gjykimi në mungesë, duke e shpallur fajtor për krime që përfshijnë vrasje, tortura dhe arrestime arbitrare gjatë luftës gati 14-vjeçare të vendit.
Ky ishte dënimi i parë ndaj Assadit, i cili u rrëzua nga pushteti gjatë një ofensive të rebelëve në dhjetor të vitit 2024, që i dha fund sundimit të hekurt disa dekadësh të familjes së tij mbi Sirinë, si dhe luftës brutale që vrau qindra mijëra sirianë.
Assadi u largua nga kryeqyteti, Damasku, ndërsa luftëtarët rebelë po afroheshin, gati dy vjet më parë, dhe aktualisht ndodhet në Moskë.
Në një gjykim ndaj ish-zyrtarëve qeveritarë të martën, një gjykatës e dënoi Assadin me vdekje për krimet e “vrasjes së paramenduar dhe të qëllimshme të më shumë se një personi dhe të fëmijëve, torturës, arrestimit arbitrar dhe krimeve kundër njerëzimit”.
Edhe Atef Najib, një zyrtar i sigurisë gjatë sundimit të Assadit, u dënua me vdekje.
Assadi, i lindur më 1965, u bë president në vitin 2000, pas vdekjes së babait të tij, Hafezit.
Ai vazhdoi sundimin e familjes dhe dominimin e sektit të tyre alavit në vendin me shumicë myslimane sunite, si dhe ruajti statusin e Sirisë si aleate e Iranit dhe kundërshtare e Izraelit dhe Shteteve të Bashkuara.
I ndikuar në vitet e para nga lufta në Irak dhe kriza në Liban, sundimi i Assadit u përcaktua nga lufta civile, e cila doli jashtë kontrollit pas Pranverës Arabe të vitit 2011, kur sirianët që kërkonin demokraci dolën në rrugë dhe u përballën me forcë vdekjeprurëse./rel
