Shtetet anëtare të Bordit të Paqes premtojnë 5 miliardë dollarë për ndihmën humanitare dhe përpjekjet e rindërtimit në Gaza.
Këtë gjë e ka bërë të ditur ambasada amerikane në Tiranë në një postim në rrjetin social, teksa ka ndarë një postim të Shtëpisë së Bardhë.
“Shtetet anëtare të Bordit të Paqes premtojnë 5 miliardë dollarë për ndihmën humanitare dhe përpjekjet e rindërtimit në Gaza”, thuhet në postimin e ambasadës amerikane.
Kujtojmë se kryeministri Edi Rama ndodhet në Shtetet e Bashkuara të Amerikës, për takimin inagurues të nismës së Bordit të Paqes, e krijuar nga Presidenti Donald Trump.
Kreu i qeverisë do të përfaqësojë Shqipërinë, si një anëtare themeluese, teksa vendi ynë do të ketë një mandat tre vjeçar.
19 shtetet e tjera e firmosën marrëveshjen në Davos më 22 janar, përfshirë këtu dhe Kosovën. Rama mungoi pasi në atë ditë priti në Vlorë për një vizitë vajzën e presidentit të SHBA-së, Ivanka Trump.
Takimi i kësaj të enjteje, do të zhvillohet në Uashington dhe punimet do të drejtohen nga kreu i shtetit amerikan ndërsa sfida e parë e këtij bordi është rindërtimi i Rripit të Gazës.
Gjithashtu, pritet që kreu i qeverisë shqiptare, përpos pjesëmarrjes në takimin e nivelit të lartë, të zhvillojë dhe takime të tjera me eksponentë amerikanë.
Përgjigjen pozitive të ftesës së Donald Trump, Rama e bëri me dije të djelën gjatë podcastit të tij, ku theksoi se vendi ynë nuk ka asnjë detyrim financiar gjatë mandatit të parë, por do të japë kontribut si një vend i cili më parë ka vuajtur nga një izolim total për shkak të diktaturës.
Sa i përket takimit, më herët Trump ka deklaruar se shtetet anëtare kanë premtuar një shumë prej 5 miliardë dollarësh që do të shkojnë për rindërtimin e Gazës.
Bordi pritet gjithashtu të dëgjojë më shumë detaje rreth Forcës Ndërkombëtare të Stabilizimit, e cila do të mbikëqyrë Gazën sipas planit 20-pikësh të administratës Trump për t’i dhënë fund luftës së Izraelit në Rrip, të njoftuar vitin e kaluar.
Shtëpia e Bardhë ka ftuar zyrtarisht 50 vende të bashkohen me Bordin e Paqes, me 35 udhëheqës që kanë treguar interes. Deri më tani, 26 vende janë bashkuar dhe janë caktuar si anëtarë themelues të bordit. Të paktën 14 vende kanë refuzuar ftesat.
