Franca akuzohet se dëshiron të testojë një vaksinë kundër koronavirusit në Afrikë. Prej ditësh, një teori konspirative ka qarkulluar në rrjet rreth një plani të pretenduar për të përdorur afrikanët si kavie për të bërë provën e vaksinës. Deklaratat janë bërë nga disa mjekë francezë, përfshirë kryetarin e njësisë së kujdesit intensiv të spitalit parizien Cochin, Jean-Paul Mira.
Sipas “La Repubblica”, Mira ka deklaruar diçka të tillë në një transmetim televiziv në 1 prill. “Nëse unë mund të jem provokues, nuk duhet ta bëjmë këtë studim në Afrikë, ku nuk ka maska, nuk ka trajtime, nuk ka ringjallje, pak a shumë si në disa studime të HIV AIDS, apo në mesin e prostitutave sepse ne e dimë se ata janë shumë të ekspozuar?”. I ftuari tjetër në studio, Camille Locht, drejtori i hulumtimit në “Inserm”, u përgjigj: “Në rregull, ne po mendojmë paralelisht një studim në Afrikë me të njëjtën lloj qasjeje.”
Eksperimentimi, pra, nuk ka të bëjë me një vaksinë të re ende nën studim, por që tashmë ekziston kundër tuberkulozit – i ashtuquajturi Bcg – për të verifikuar nëse mund të ndihmojë në mbrojtjen kundër COVID-19 ose të lehtësojë efektet e tij. Ende është një hipotezë teorike që diskutohet në komunitetin shkencor.
Fjalët e Mira dhe Locht, të cilët ndërkohë kanë kërkuar falje, kanë detyruar Organizatën Botërore të Shëndetësisë të reagojë.
“Ato janë deklarata raciste. Është e turpshme dhe e tmerrshme të dëgjosh shkencëtarët të bëjnë këto deklrata në shekullin 21. Këto fjalime raciste bien ndesh me frymën e solidaritetit. Afrika nuk mund dhe nuk do të jetë një terren testimi për ndonjë vaksinë.”
Ministria e Jashtme franceze tha se deklaratat e dy shkencëtarëve nuk pasqyrojnë qëndrimin e autoriteteve franceze.
