Takimi historik mes presidentit amerikan Donald Trump dhe liderit të Koresë së Veriut Kim Jong Un, mund të shtyhet. Kështu është shprehur kreu i Uashingtonit gjatë takimit me Presidentin e Koresë së Jugut, Mun Jae-in, në Shtëpinë e Bardhë.
Vizita e udhëheqësit të Koresë së Jugut në Uashington vjen në një moment të paqartë për fatin e samitit historik mes Trump dhe Kim Jong-un i cili duket se po rrezikohet seriozisht.
Takimi është paralajmëruar se do të mbahet në Singapor muajin e ardhshëm, por sinjalet që mbërrijnë nga Uashingtoni dhe Pheniani tregojnë se dy liderët nuk kanë dakordësi mbi termin “denuklearizim”.
Koreja e Veriut ka kërcënuar të tërhiqet nga bisedimet nëse zyrtarët amerikanë nuk zmbrapsen nga linja e ashpër e pozicionit të tyre negociues.
Amerikanët nga ana tjetër kanë deklaruar vazhdimisht se presin që Koreja e Veriut të pranojë në takim çarmatimin e saj të plotë, të verifikueshëm dhe të pakthyeshëm, sepse Uashingtoni nuk do të pranojë asgjë më pak se kaq.
Një ditë më parë, Mike Pence, zëvendës presidenti i SHBA, tha se Koreja e Veriut mund të përfundonte si Libia nëse nuk arrin një marrëveshje bërthamore me Uashingtonin. Pence ka përforcuar kështu zërat se edhe Trump mund të heqë dorë nga samiti i planifikuar më 12 qershor.
Edhe vendi komunist ka kërcënuar me largim pas komenteve të Këshilltarit për Siguri Kombëtare në Shtëpinë e Bardhë, John Bolton, i cili gjithashtu ka përmendur “Modelin e Libisë” për denuklearizimin.
