Këngëtarja Céline Dion ka dhuruar një surprizë të veçantë për fansat në ditëlindjen e saj të 58-të, duke njoftuar rikthimin në skenë me një seri koncertesh në Paris.
Artistja bëri të ditur se do të performojë në 10 koncerte përgjatë pesë javëve në Paris La Défense Arena gjatë kësaj vjeshte. Këto do të jenë koncertet e saj të para që nga momenti kur zbuloi në vitin 2022 se vuan nga stiff-person syndrome.
Në një video të publikuar në Instagram, këngëtarja e hitit My Heart Will Go On u shpreh optimiste për gjendjen e saj shëndetësore.
“Jam shumë mirë, po menaxhoj shëndetin tim, ndihem mirë dhe kam filluar të këndoj sërish. Madje kam bërë edhe pak vallëzim,” tha ajo, duke shtuar se ishte hera e parë që regjistronte një mesazh për ditëlindjen e saj.
Shitja e përgjithshme e biletave për koncertet do të nisë më 10 prill, ndërsa fansat do të kenë mundësi të blejnë bileta më herët përmes fazave të parapara të para-shitjes.
Pak ditë para njoftimit zyrtar, Dion kishte paralajmëruar rikthimin e saj me disa fotografi nga Paris, ku shfaqeshin edhe tituj të këngëve të saj më të njohura nëpër qytet.
Kujtojmë se koncertet e saj të planifikuara në vitin 2020 u shtynë për shkak të pandemisë COVID-19, ndërsa më pas turneu u anulua për shkak të gjendjes së saj shëndetësore.
Megjithatë, artistja bëri një rikthim të shkurtër në skenë në ceremoninë hapëse të Paris 2024 Olympics, si dhe në një event mode në Arabinë Saudite, duke sinjalizuar rikthimin e saj të plotë në muzikë.
/vizionplus.tv
