Autoriteti Kombëtar për Sigurinë Kibernetike (AKSK) ka ngritur alarmin për një fushatë mashtrimi që po qarkullon përmes mesazheve SMS, të cilat paraqiten si njoftime për gjoba trafiku të papaguara dhe synojnë të vjedhin të dhënat personale dhe bankare të qytetarëve.
Sipas njoftimit zyrtar, mesazhet përmbajnë lidhje të dyshimta që ridrejtojnë përdoruesit drejt faqeve që imitojnë platformën zyrtare e-Albania, me qëllim përvetësimin e kredencialeve, të dhënave personale dhe informacioneve bankare.
AKSK bën me dije se ka ndërmarrë masat e nevojshme duke referuar rastin pranë Drejtorisë për Hetimin e Krimeve Kibernetike në Policinë e Shtetit, si dhe pranë Autoritetit të Komunikimeve Elektronike dhe Postare (AKEP), për bllokimin e domain-eve dhe adresave IP të përdorura në këtë aktivitet keqdashës.
Autoriteti u bën thirrje qytetarëve të tregojnë kujdes dhe të mos klikojnë në lidhje të panjohura apo të dyshimta. Gjithashtu, rekomandohet që të mos ndahen të dhëna personale apo bankare dhe të verifikohet gjithmonë adresa e faqes që po vizitohet.
Reagimi i autoriteti Kombëtar për Sigurinë Kibernetike
KUJDES NGA MESAZHET MASHTRUESE
Autoriteti Kombëtar për Sigurinë Kibernetike (AKSK) ka identifikuar një fushatë mashtrimi përmes mesazheve SMS, të cilat paraqiten si njoftime për gjoba trafiku të papaguara dhe ridrejtojnë përdoruesit drejt faqeve që imitojnë platformën zyrtare e-Albania me qëllim përvetësimin e të dhënave personale, kredencialeve dhe informacioneve bankare.
AKSK ka ndërmarrë masat e nevojshme duke referuar pranë Drejtorisë për Hetimin e Krimeve Kibernetike në Policinë e Shtetit, si dhe pranë AKEP, domain-et dhe adresat IP të përdorura në këtë aktivitet keqdashës për marrjen e masave përkatëse të bllokimit.
Mesazhet përmbajnë lidhje të dyshimta që synojnë të përvetësojnë të dhëna personale, kredenciale dhe informacione bankare.
Për t’u mbrojtur:
* Mos klikoni në lidhje të dyshimta.
* Mos ndani të dhëna personale apo bankare.
* Verifikoni gjithmonë adresën e faqes që po vizitoni.
* Përdorni vetëm kanalet zyrtare për të kontrolluar apo kryer pagesa.
Nëse dyshoni se keni rënë pre e këtij mashtrimi, kontaktoni menjëherë bankën tuaj dhe raportoni rastin pranë autoriteteve përkatëse.
/vizionplus.tv
