Ekspertët e mjedisit, të turizmit dhe inxhinierët janë ndarë në këndvështrime të ndryshme për mënyrën se si mund të zhvillohet zona turistike e Zvërnecit.
Por të gjithë janë në një mendje kur thonë se zona duhet të zhvillohet në funksion të turizmit. Besnik Vathi, nga shoqata e tur-operatorëve, tha se debati i deritanishëm është i parakohshëm pasi ende nuk po ka një vendimmarrje finale
“Fillimisht duhet të kemi një përgjigje finale, do ketë apo jo ndërtim dhe si do të jetë ai. Turizmi ka nevojë për investime dhe ka nevojë për shtim të kapaciteteve akomoduese. Por duhet të na thonë se çfarë ideje kanë për zhvillimin e zonës. Nuk duhet t’ia lëmë në dorë investitorit se si zhvillohet zona, por duhet ta përcaktojë vetë qeveria mënyrën që do të ndiqet për zhvillimin e saj”, tha Vathi gjatë një interviste në Vizion Plus.
Aktualisht ka një debat mbi mënyrën që do të ndiqet për zhvillimin e turizmit, por sipas Vathit mësimet duhen nxjerrë nga e kaluara.
“Ne kemi para disa zona zhvillimi turistike, siç është Golemi. Kjo zonë është kthyer në një zonë urbane me ndërtime pa kriter që kanë detin pranë. Ndërkohë duhet të jetë e kundërta. Zonat bregdetare duhen zhvilluar për të sjellë një vlerë të shtuar në turizëm. Emrat e hoteleve që përfliten në Sazan apo Zvërnec janë brande shumë të mëdha që i bëjnë mirë tregut vendas. Por vija e kuqe është që zona të mos jetë për banim, por vetëm me hotele të nivelit premium. Ajo vijë bregdetare mban 10-15 mijë dhoma premium, niveli më i lartë i cilësisë”, tha Vathi.
/vizionplus.tv
