Pas një konference të mbushur me sulme dhe akuza për kryeministrin Edi Rama, ky i fundit ju përgjigj me ironi e tallje në rrjetet sociale kryedemokratit Lulzim Basha.
Si fillim, Rama ironizoi ambientin ku mban Basha konferencat, duke e krahasuar me sallë dasmash. Kurse vetë Lulzim Bashën e quan dhëndër të inatosur.
Më tej, i kthen përgjigje për akuzat për inceneratorët. Sipas Ramës, qytetarët nuk votojnë për kryeministër dikë që kërkon t’i kthejë tek plehrat.
“Po ç’është ajo sallë dasmash ku i bëke konferencat o Lulëzim?!Të ndoqa pak sot e u habita, qesharake shumë salla dhe ti si dhëndërr i inatosur që klithje pse po pastrohet Shqipëria nga plehrat! Po si mund të jesh kaq nostalgjik për plehrat që i bëre mal në Tiranë e ndote dynjanë! Po si mund t’u thuash shqiptarëve që mafia po pastron Shqipërinë nga haletë gjigande në mes të qyteteve më të mëdha të vendit e nga helmet që pushtuan ajrin me dekada në Tiranë, Durrës, Elbasan, Fier e gjetkë?! Po pse kështu do bëhesh KM ti o miku im Artist, me plehrat në gojë?! E ke dëgjuar mirë nga unë, se ta kam thënë shpesh, shqiptarët s’janë budallenj, po ajo që s’kupton ti kur e thua këtë është se shqiptarët s’kthehen më tek plehrat o Lul!Sa më shumë do vuash në sytë e tyre duke qarë për plehrat që po pastrohen,aq më shumë do mërzitesh në 25 prill!”
Në bashkëbisedimin e sotëm me gazetarët, Basha kërkoi nga SPAK që të nisë menjëherë hetimet për aferën që sipas tij bëhet me pastrimin e plehrave.
