Gjermania, Austria, Greqia, Danimarka dhe Holanda po punojnë për një marrëveshje që do t’u mundësonte dërgimin e migrantëve pa leje qëndrimi në qendra kthimi jashtë territorit të Bashkimit Europian.
Pesë vendet e unionit kanë bërë hapa konkretë drejt një marrëveshjeje me të paktën një shtet jashtë BE-së. Qëllimi është krijimi i qendrave të kthimit, struktura jashtë BE ku emigrantët e paligjshëm do të dërgoheshin teksa presin procedurat e riatdhesimit.
Megjithatë, vendet nuk kanë bërë të ditur se cilat shtete mund të shërbejnë si destinacione për këto qendra.
Ministri i Brendshëm gjerman, Alexander Dobrindt deklaroi se vendet synojnë të arrijnë marrëveshjen sa më parë .
“Ne duam të arrijmë një marrëveshje me vendet e treta këtë vit që do të mundësojë krijimin e qendrave të kthimit”, tha Alexander Dobrind, ministri i Brendshëm i Gjermanisë
Grupi i pesë vendeve ka zhvilluar disa takime dhe i radhës pritet të mbahet në Mynih, në fund të shtatorit.
Danimarka është një nga vendet që po e shtyn më fort këtë nismëduke thënë se vendi synon të jetë gati për të dërguar migrantët në një qendër kthimi deri në fund të vitit 2027.
Pesë vendet pritet gjithashtu të konsultohen me Organizatën Ndërkombëtare për Migracionin dhe Agjencinë e OKB-së për Refugjatët për hapat e mëtejshëm.
Aktualisht, Shqipëria ka një marrëveshje me Italinë për qendrën e pritjes së emigrantëve në Gjadër, megjithatë kryeministri Edi Rama ka deklaruar se ajo është vetëm për vendin fqinj.
