Në një intervistë për emisionin “Vizioni i Pasdites” në Vizion Plus, ish deputete dhe tehemeluese e Partisë Libra, Mimoza Hafizi I është rikthyer edhe njëherë përvojës së saj në politikë. E pyetur për Partinë Libra, Hafizi ka renditur një sërë arsyesh përse kjo forcë politike degradoi, teksa ka pranuar për herë të parë dhe sulmet brenda llojit në parti ashtu sikurse edhe ato jashtë saj.
“Partia Libra nuk arriti të mbante kohezionin e vet për shumë arsye, sepse ishte një parti ndoshta me një program të papërballueshëm për realitetin shqiptar e agresuar nga brenda dhe jashtë. Nuk arriti ta mbante kohezionin e vet. Nuk ka shumë rëndësi që të bëhet analiza çfarë ndodhi konkretisht se më duket që nuk ia vlen të merremi me gjërat e vogla por ta shikojmë parimisht. Kjo forcë politike mund të rritej në realitetin shqiptar po apo jo? Unë mendoj që mund të rritej por donte vullnet jashtëzakonisht të fortë nga shumë njerëz, donte sakrificë, gjë e cila nuk u dha nga shumë njerëz që erdhën tek Libra . Dhe kjo ishte arsyeja që kjo Parti degradoi”, përfundoi Hafizi.
Në janar të vitit 2018, Mimoza Hafizi u përjashtua nga Partia Libra, ku thuhej se shkak për largimin e saj ishin kryerja e disa veprimeve të cilat përbëjnë shkelje të rënda të Statutit duke cënuar seriozisht funksionimin e Organizatës Politike “Lista e Barabartë”.
