Një ditë pas protestës së banorëve të fshatit Zvezdë në Bashkinë Maliq për mungesën e ujit të pijshëm, ka reaguar institucioni vendor.
Banorët dolën sërish në protestë duke denoncuar faktin se, pavarësisht një investimi prej mbi 600 mijë eurosh për ujësjellësin e ri të fshatit, në banesat e tyre ende nuk ka furnizim me ujë.
Përmes një reagimi zyrtar, Bashkia Maliq sqaroi se investimi për ujësjellësin e Zvezdës nuk po realizohet nga bashkia, por nga Ujësjellës Kanalizime Rajonale Korçë sh.a.
Sipas bashkisë, projekti është kërkuar nga institucioni vendor dhe aktualisht është në proces zbatimi nga UK Rajonal Korçë, e cila ka në administrim dhe përgjegjësi funksionimin e sistemit të ujësjellësit të fshatit.
Bashkia Maliq thekson se shqetësimi i banorëve për mungesën e ujit është i drejtë dhe se ka ndjekur vazhdimisht ecurinë e investimit, duke komunikuar me institucionin përgjegjës.
Sipas reagimit, synimi është që punimet të përfundojnë sa më shpejt dhe sistemi i ri i furnizimit me ujë të pijshëm të vihet në funksion të plotë për banorët e Zvezdës.
/vizionplus.tv
