Të shtëna me armë janë regjistruar pranë Konsullatës së SHBA-së në qendër të Torontos herët të hënën, por nuk ka pasur persona të lënduar, njoftoi policia. Ky është incidenti i dytë i këtij lloji në katër muajt e fundit.
Sipas policisë së Torontos, efektivët u njoftuan për ngjarjen pasi dëgjuan një të shtënë dhe më pas gjetën prova se një armë ishte përdorur jashtë ndërtesës së konsullatës, në University Avenue.
Autoritetet thanë se një automjet sedan me ngjyrë të bardhë u pa duke u larguar nga vendi i ngjarjes. Nuk pati viktima apo persona të plagosur.
Më 10 mars, disa të shtëna u regjistruan ndaj së njëjtës ndërtesë, pas tre incidenteve të ndara ku u qëllua me armë pranë sinagogave në zonën e Torontos. Pas këtyre ngjarjeve, policia rriti masat e sigurisë pranë konsullatave të SHBA-së dhe Izraelit në Toronto, qyteti më i madh i Kanadasë.
Në qershor, policia deklaroi se persona të rinj në zonën e Torontos dyshohet se ishin paguar për të qëlluar ndaj objektivave të ndryshme, përfshirë sinagoga, shkolla hebraike dhe Konsullatën e SHBA-së. Tre persona u arrestuan në lidhje me sulmin e marsit, ndërsa gjatë operacionit policor një oficer humbi jetën.
Një zëdhënës i Departamentit amerikan të Shtetit tha se Shtetet e Bashkuara po bashkëpunojnë ngushtë me autoritetet kanadeze pas incidentit. Ai theksoi se Ambasada amerikane dhe konsullatat në Kanada vazhdojnë të jenë të hapura dhe funksionojnë normalisht, megjithëse disa shërbime rutinë konsullore në Toronto janë riplanifikuar.
Zëvendës shefi i Policisë së Torontos, Frank Barredo, tha se një oficer i caktuar për sigurinë e Konsullatës së SHBA-së dëgjoi një të shtënë rreth orës 04:46 të mëngjesit sipas kohës lokale. Më pas, policia gjeti një gëzhojë dhe konstatoi dëmtime në pjesën e përparme të ndërtesës.
Policia ndoqi për një kohë të shkurtër një automjet që largohej nga zona, por e ndërpreu ndjekjen për shkak të shpejtësisë së lartë të tij.
Kryeministri i Ontarios, Doug Ford, dënoi sulmin me armë, si dhe aktet e vandalizmit ndaj dy furrave hebraike në Toronto gjatë fundjavës.
“Jam plotësisht i revoltuar nga të shtënat dhe aktet e vandalizmit që ndodhën në Toronto ditët e fundit, përfshirë dy bizneset hebraike gjatë fundjavës dhe incidentin pranë Konsullatës së SHBA-së këtë mëngjes”, shkroi Ford në platformën X. Ai shtoi se hetimet policore janë në zhvillim dhe se personat përgjegjës duhet të gjenden, të ndiqen penalisht dhe të dënohen në përputhje me ligjin.
/vizionplus.tv
