Mjeku Erion Dasho deklaroi se Shqipëria është vendi i vetëm që ndalon vizitat e familjarëve për të infektuarit që janë të shtruar në spitalet COVID. Duke folur për edicionin e lajmeve në “Vizion Plus”, Dasho tregoi shembuj konkretë sesi në Turqi kjo gjë funksionon krejt ndryshe.
“Sa i takon masave të përgjithshme, duke qenë se pacienti trajtohet larg familjes, është domosdoshmëri që të ndryshojë ky përafrim. Qytetari që ka mundësi të hapë derën, të hipë në tarracë, të hidhet nga ballkoni, tregon se shëndeti i tij nuk është dëmtuar aq shumë sa të trajtohet në spitalet COVID, por pranë familjes së tij apo në një spital rajonal. Vetëm në Shqipëri ndodh akoma që pacientët nuk vizitohen nga familjarët. Në Turqi unë kam patur miq të mi dhe atje vizitat e familjarëve në spitalet COVID nuk ndalohen, thjesht kanë një orar të caktuar dhe shtohet niveli i masave mbrojtëse.”
Sipas mjekut, ndalimi i vizitave të familjarëve bëhet factor që të ndodhin vetëvrasje.
Sa u takon masave anti-COVID të Komitetit të Ekspertëve, Erion Dasho tha se deri tani nuk është marrë asnjë masë efektive që mund të ketë impakt mbi ecurinë e epidemisë.
