Ish-deputeti demokrat, Ervin Salianji, ka reaguar pas refuzimit të dokumentacionit të tij për t’u regjistruar në garën për kreun e PD-së.
Me anë të një statusi në rrjetet sociale, Salianji thekson se PD është pasuri kombëtare dhe jo pronë private.
Sipas tij, ajo që ndodhi sot është një akt i padëgjuar ndonjëherë në historinë politike. Më tej, Salianji thekson se kjo betejë nuk përfundon sot, por do të vijojë.
Postimi i Salianjit:
Partia Demokratike është pasuri e shqiptarëve. Ajo nuk mund të jetë pronë private.
Sot u konsumua një akt i padëgjuar ndonjëherë në historinë politike: refuzimi i pranimit të dokumenteve të kandidimit për kryetar të Partisë Demokratike.
Ky nuk është thjesht një vendim procedural. Është prova më e qartë se Partia Demokratike po trajtohet si pronë personale dhe jo si një aset publik i ndërtuar me sakrificë nga mijëra demokratë.
Kur ndalohet gara, nuk mbrohet partia, por mbrohen interesat e ngushta të një grupi që vetëm ka frikë: ka frikë nga vota, ka frikë nga drejtësia, ka frikë nga e kaluara.
Unë nuk kam kërkuar privilegje. Kam kërkuar garë.
Nuk kam kërkuar emërim.
Kam kërkuar votë. Kjo është demokracia dhe vetëm kështu Partia Demokratike mund të rikthehet fituese!
Ky nuk është refuzim ndaj meje, por është refuzim ndaj çdo demokrati që beson se kjo parti duhet të jetë e hapur, konkurruese dhe fituese. Praktikisht është uzurpim i funksioneve!
Kjo është një betejë për parim, jo për post.
Dhe kjo betejë nuk mbaron sot.
Sepse Partia Demokratike është më e madhe se çdo individ që tenton ta mbajë peng.
