Përballja e Taulant Ballës në GJKKO me dhëndrin e Sali Berishës, Jamarbër Malltezi, në GJKKO për çështjen “Partizani” ishte një nga pikat e diskutimit mbrëmjen e kësaj të enjteje në “Quo Vadis” në Vizion Plus.
I ftuar në studio, gazetari Denis Minga tha se seanca iu duk krejt normale dhe e qetë. I pyetur se si e pa pozicionin e Taulant Ballës në rolin e dëshmitarit, Minga tha se ai është në kushte më të mira se të akuzuarit.
Ndërsa analisti Endri Tafani theksoi se asnjë politikan nuk mund të jetë në pozicion të vështirë.
Sipas tij, kjo çështje ka bërë më shumë bujë mediatike nga sa ka nevojë realisht.
Pjesë nga debati:
Borakaj: 4 orë Balla në gjykatë, si t’u duk?
Minga: M’u duk një proces normal. Për herë të parë patëm një proces normal, ku palët kishin pyetje dhe Balla dha përgjigjet e tij. Pati ndonjë ndërhyrje tek-tuk të gjyqtares, e pashë si proces normal.
Borakaj: T’u duk Balla në pozicion të vështirë?
Minga: Forma ishte shumë normale. Për herë të parë pashë diçka ku një format me katër aktorë funksionoi si në një vend normal. Balla është në pozita më të favorshme se pala e pandehur. Edhe nëse do të ishin të hapura seancat, nuk do të kishte asgjë të keqe.
Borakaj: Tafani, si t’u duk Balla?
Minga: Nuk mendoj se ka ndonjë politikan në pozitë të vështirë. Siç mund të bëjë aludime në sallën e parlamentit, mund t’i bëjë edhe në sallën e gjyqit. Pra, thua që “unë kështu e kam lexuar këtu” dhe raporton diçka që ti e di shumë mirë që është gënjeshtër, por e sjell në gjyq. Politikanët nuk është se kanë ndonjë problematikë të madhe kur dalin në gjykata. Në këtë rast ndryshon pak situata, sepse është pjesë e akuzës që është bërë për korrupsion. U shfaq në gjykatë një nga pretendimet e Gjokutaj, pjesa e kallëzimit që ishte bërë në SPAK, ku thuhej se Balla mund të akuzohet për kallëzim të rremë, sepse nuk ka qenë akuza e korrupsionit dhe pastrimit të parave, të cilat sipas tyre Balla i kishte ngritur në SPAK kundër Malltezit.
Minga: Atë s’e bën Balla, e bën prokuroria. Për mua ishte mbrojtje e dobët.
Tafani: Në këtë rast ishte për kallëzimin, sepse kallëzimi i rremë është vepër penale. Nuk kërkonte të kishte një bujë kaq të madhe mediatike; kemi çështje më të mëdha, sepse çmimet po shkojnë në rritje. Të merresh me 4 orë qëndrimin e Ballës aty, mendoj se ishte një fryrje mediatike.
