Zgjatja e proceseve gjyqësore dhe masat e sigurisë kanë qenë në fokus të emisionit QUO VADIS në Vizion Plus këtë të enjte.
I ftuar në studio analisti politik Endri Tafani tha se çdo rast ka specifikat e veta, por nënvizoi se periudha e gjatë nga hetimi deri në nisjen e gjykimit mbetet problematike.
Ai e cilësoi jo normale faktin që Ilir Meta ka qëndruar rreth një vit e gjysmë në paraburgim, duke shtuar se, për shkak të statusit të tij si ish-president, mund të ishte marrë një masë më e lehtë sigurie.
Pjesë nga biseda:
Borakaj: Dikur njerëzit dëshironin shumë që të paprekshmit, të vinte dita që të dilnin përballë drejtësisë. Por zzgjatja kaq shumë e proceseve, pamja si ajo e Metës, ka filluar në një lloj viktimizimi pa u ndalur te akuza.
Tafani: Secili rast është i ndryshëm nga njëri politikan te tjetri. Në çdo rast ka nuanca të ndryshme. Ajo që mund të shihet është që ka një periudhë të gjatë nga momenti i parë që ti merresh deri sa nis gjykata procedurat e veta. Ilir Meta u bë 1 vit e gjysmë në paraburgim, nuk është normale. Rasti i Ilir Metës, duke qenë se ka qenë edhe president i vendit, mund edhe të ishte në gjendje të lirë ose me masë “moslargim nga vendi”, sesa të rrinte në paraburgim. Është absurde të shkohet në këtë për një figurë që ka qenë president. Fakti i paraqitjes me vonesë së provave nuk është normal.
/vizionplus.tv
