Në cilësinë e kallëzuesit të çështjes, kreu i grupit parlamentar të Partisë Socialiste, Taulant Balla ka dhënë dëshminë e tij për dosjen “Partizani” këtë të enjte në Gjykatën e Posaçme.
Për togat e zeza, shefi i deputetëve socialistë, ka pretenduar se procesi i privatizimit të ish-klubit Partizani nuk është zhvilluar sipas procedurave ligjore dhe përfituesit kanë shfrytëzuar pushtetin e lidhjes së tyre familjare, konkretisht atë të kryeministrit të kohës, Sali Berisha.
Taulant Balla u shpreh se kallëzimin e ka firmosur si qytetar, jo si politikan.
E ftuar në studion e QUO VADIS në Vizion Plus, gazetarja Enkeleda Mema tha se është e vështirë të besohet se një kallëzim i tillë është bërë pa dijeninë e drejtuesve të Partisë Socialiste, duke e cilësuar atë si një vendimmarrje politike.
Ajo theksoi se përgjigjet e Ballës gjatë seancës ishin të përgjithshme dhe më shumë i referoheshin mediave sesa fakteve konkrete.
Nga ana tjetër, avokati Ermal Yzeiraj e cilësoi Ballën më shumë si kallëzues sesa dëshmitar. Ndërkohë, gazetari Denis Minga u ndal te mënyra e zhvillimit të seancës, duke ngritur shqetësime për trajtimin e të pandehurve në sallën e gjyqit.
Pjesë nga biseda:
Borakaj: Ka qenë në siklet Z.Balla sot? Sa i sinqertë ishte në atë që tha se kryeministri Edi Rama s’ka pas dijeni në kallëzim?
Mema: Nuk besoj se ka qenë një kallëzim pa dijeni e z.Ramës. Madje, para shumë kohësh, para se të bëhej kallëzimi, ka qenë në dijeni se ka qenë edhe një konferencë për mediat, dhe asaj kohe vetrë unë e kam pyetur. Sigurisht që është një vendimmarrje e Partisë Socialiste. Nuk mendoj se Balla shkon i drejtohet SPAK pa dijeninë e PS dhe Ramës. Ajo që më bëri përshtypje ishte se përgjigjet e Ballës i referoheshin mediave, nuk kishte përgjigje thelbësore që të hetonte. Diçka për të mbetur në mendje nuk është se kishte. Ishte një seancë e qetë. Madje, në disa pyetje-përgjigje dukej sikur Balla nuk kishte përgjigje në disa raste.
Yzeiraj: Z.Balla është një dëshmitar që thjesht ka parë ca lajme dhe i ka sjellë në formën e një kallëzimi. Më tepër është dëshmitar se sa kallëzuesi vetë.
Minga: Të gjithë ishin ulur para kafazit sot, edhe klienti edhe avokati. Të gjithë të pandehurit janë me avokatët e tyre, nuk janë në kafaz. Këtë nuk e kuptoj pse një gjyqtar të jetë me kafaz, një pa kafaz. Kjo është në vendimin e vetë gjyqtarit. Unë jam interesuar dhe më kanë thënë është çështje salle, por ja që nuk qenka.
/vizionplus.tv
