Pas 6 muajsh finalizohet operacioni “Ulëza” në Mat në kuadër të luftës kundër kultivimit dhe trafikimit të lëndeve narkotike.
Në pranga përfunduan R. T., 32 vjeç dhe N. T., 33 vjeç, banues në Ulëz, Mat.
Po ashtu u shpall në kërkim shtetasi E. Ll, 29 vjeç, banues në Baz, Mat.
Në afërsi të shkollës së mesme të Njësisë Administrative Baz ditën e hënë, këta shtetas janë kapur në flagrancë, në momentin që po shkëmbenin një sasi lekësh me njëri- tjetrin, e cila dyshohet se është përfituar nga veprimtaria kriminale në fushën e narkotikëve.
Këta shtetas në bashkëpunim me njëri – tjetrin, dyshohet se janë autorë të disa rasteve të tentativës për të kultivuar bimë narkotike në zonat malore të njësive administrative Ulëz dhe Baz, të cilat janë asgjësuar më parë nga Policia gjatë kontrolleve të territorit.
Janë sekuestruar në cilësinë e provës materiale: 6 400 euro, 24 100 lekë, 45 gram lëndë narkotike, 1 orë dore dhe 1 aparat celular.
Policia e Matit, në bashkëpunim me Prokurorinë e Rrethit Gjyqësor Mat, po punon intensivisht për arrestimin e personave të tjerë të implikuar në këtë veprimtari të paligjshme.
