Ish-ministri i Drejtësisë, Ylli Manjani ka komentuar mesazhin e Ambasadës së SHBA-së, ku theksoi se është në mbështetje të sundimit të ligjit dhe që SPAK duhet të ketë sukses. Mirëpo, sipas tij, kjo funksionon duke mos i dalë më në mbrojtje kryeministrit Edi Rama, të cilin e quan “bosi”.
“Ambasada e SHBA thotë është në ..”mbështetje të sundimit të ligjit..”.
I couldn’t agree more! 1000% dakort! Këtë po kërkojmë të gjithë të sundojë ligji dhe jo Bosi!
Që kjo të ndodhë, si fillim duhet ndaluar mbështetja për Bosin, që dhunon sistematikisht Kushtetutën e Republikës, pikërisht për të mos lejuar sundimin e ligjit. Kushtetuta është ligji më i rëndësishëm në vend,por që ka dalë nga funksioni për shkak të ndërhyrjeve të Bosit. Ky i fundit na thotë se i bën me bekimin e Amerikës… Në vijim duhet ndaluar Bosi të përgjojë, shantazhojë e kërcënojë gjykatës e prokurorë. Vetëm drejtësia e pavarur është garanci për sundimin e ligjit.”
Ndër të tjera, Manjani tha se SPAK duhet ta çlirojmë nga mbingarkesa artificial, e më pas ta mbështesim. Ndërsa hodhi kritika edhe ndaj Ambasadës së SHBA-së duke thënë se nuk bënë gjithmonë ato që thotë.
“Ta ndihmojmë të fokusohet tek tenderat pa garë dhe sekret, ku gjithmonë fituesi i bie në kokë çmimit; tek koncensionet abuzive; tek abuzimi me financat publike në tërësi. Kështu që jam krejt dakort me sa thotë Ambasada Amerikane, pavarësisht se jo gjithmonë ato që bën korrespondojnë me këtë që thotë..! Nëse duan të na ndihmojnë të sundojë ligji, duhet të mos mbështesin ato që bën Bosi.
Përndryshe nëse do vijojnë të na thonë se ata “punojnë me Bosin (dmth qeverinë)”, duhet të mbajnë në konsideratë se sundim të ligjit nuk ka. P.s. Për të qenë i drejtë në argument, fjala “Bosi” sot nënkupton Edi Ramën. Por në parim kjo gjë ka ndodhur dhe mund ndodhë edhe me të tjerë në vend të tij. Prandaj preferoj ti qëndroj argumentit në parim.”
