Ministri i Shtetit për Diasporën, Pandeli Majko ndodhet në “vijën e zjarrit” në listën e PS për Qarkun e Tiranës dhe pranoi se nuk ndihet mirë.
Por shtoi se as një pozicion më i sigurt përballë figurave të reja nuk do ta bënte të ndihej më mirë.
Në një intervistë për “Zgjedhje 2021” në “Vizion Plus”, Majko deklaroi se lista e PS do të mbledhë votat që do t’i sigurojnë më pas fitoren.
“Ka një lloj dramaciteti, por nuk është vetëm për mua, por për të gjithë kolegët sepse ne votohemi si asnjëherë më parë në një qark me ndryshimet në Kod. Kjo është një listë që do të mbledhë votat e socialistëve. Nuk e diskutova vijën e zjarrit sepse të njëjtën gjë ka bërë Edi Rama, të njëjtën gjë ka bërë Gramoz Ruçi. Unë te 19-ta, nuk ndihem mirë sepse statusi im është i barabartë me statusin e dikujt që është i njohur si përkrahës i PS dhe nëse në 26 merret vesh që kundërshtari ynë ka fituar, ai rrezikohet siç rrezikohem unë, Edi Rama, Gramoz Ruçi. Nuk duhet të diskutojmë kaq gjatë, kur ne fjalën “humbje” e kemi të fundit. 19-ta është objektivi i PS për Qarkun e Tiranës. Do të isha në pozitë shumë të vështirë nëse do të isha lart dhe në vijën e zjarrit do të ishte një nga kolegët e mi më të rinj apo të sapoardhur, siç kanë bërë rëndom partitë e tjera.”
