Ish-nënkryetari i Partisë Demokratike, Edmond Spaho e konsideron të pavlefshëm vendimin e kryesisë së PD-së për ta përjashtuar.
Ai shpërtheu në akuza në drejtim të kryedemokratit Lulzim Basha, për të cilin tha se në protestën e 8 janarit i sulmoi demokratët me shkopa bejsbolli, plumba gome dhe gaz lotsjellës.
Fjala e Spahos:
Vendimi është i pavlefshëm pasi ajo kryesi nuk ekziston, nuk ka ekzistuar as me statutin e miratuar në korrik, pasi nuk u zbatuan kriteret statutore të zgjedhjes me dy kanditatura, 60 % e saj u emërua nga Lulzim Basha, përfshirë funksionet e tjera politike. Në kuvendin e 11 dhjetorit, 4446 delegatë kanë shkarkuar Bashën dhe gjithë kryesinë e ashquajtur kryesi e PD. Shkarkimi i Bashës është vendosur nga 44000 anëtarë, këta që shikoni këtu të shkarkojne, jo Basha.
‘Synimi i masave’ të ndërrmarra dje është që të largohet vëmendja nga problemi themelor që kanë demokratët. Se si Basha në 8 janar, i sulmoi demokratët me mercenarë të futur në selinë e PD-së, i sulmoi me shkopa bejsbolli, plumba gome, e blindoi selinë me dyer hekuri e më pas thirri policinë, brenda pak sekondash në sinkronizim me Edi Ramën hodhi pafund gaz lotsjellës, 12 të plagosur nga ana e anëtarëve të PD dhe qindra te tjerë të asfiksuar nga gazi, i cili u hodh pa kufizim, sikur kishin përballë ndonjë agresor. Të gjitha këto vërtetuan jo vetëm bashkëpunimin e Ramës me Bashën, por edhe që opozita e vërtetë është ajo që ka dalë nga Foltorja.
Ne do vazhdojmë të zbatojmë vendimet e Kuvendit të 11 dhjetorit, i cili do ta riorganizojë PD, me Komisionin e Rithemelimit, për një PD më të fortë. Në 8 vitet e fundit, PD degjeneroi në pikëpamje të vlerave, shkoi nga humbja në humbje, në pushtetin e një personi të vetëm qe vendimet i merr vetë. Nga Basha, çdo gjë pret, njerëz të armatosur që ne i kemi dokumentuar me foto me emra, të cilët nga zyra e tij dhe sulmuan anëtarët e PD. Keni parë të plagosurit që u dilte gjak nga hundët dhe gazlotsjellësi që hidhej nga brenda selisë.
