Një reagim për shkarkimin e Ilir Metës nga posti i presidentit e bëri edhe ish-kreu i Aleancës Kuqezi, Kreshnik Spahiu. Në “Facebook”, ai vuri në dukje faktin se askush nuk i doli në mbrojtje Metës.
“30 vjet në pushtet dhe sot asnjë ndërkombëtar nuk foli një fjalë kundër shkakrimit të Ilir Metës. Atij nuk i kishte ngelur asnjë mik apo dashamirës. Heshtën amerikanët; Heshtën europianët; Heshti OSBE; Heshtën fqinjët grek, maqedonas dhe bullgarë; Heshtën vëllezërit kosovarë që i priste me dreka dhe darka te vila e Lalzit; Heshti Ramushi dhe Albini; Heshtën mijëra të dekoruar me teneqe alumini me urdhrat “Skënderbeu” apo “Nënë Tereza”, Heshtën vëllezrit opozitarë B & B; Heshtën komshinjtë e Gjirit Lalzit; Heshti edhe Baba Mondi; Heshtën gjimnazistet e LSI; Heshtën protestuesit e 2 Marsit; Heshti edhe gruaja Monika, që e dogji me djegien e mandateve.”
Spahiu e shpjegon këtë heshtje me faktin se, sipas tij, Ilir Metës po i bëhet funeral politik. Ai shtoi se kreun e shtetit e pret gijotina.
“Të gjithë heshtën sepse në fund e kuptuan që dhe ajo fije burrëri fiktive që mendonin nuk ekzistoi tek ai në 26 Prill kur duhet të jepte dorëheqje si premtim, për intergritet me publikun dhe miqt e tij. Të gjithë heshtën sepse askush nuk e konsideronte një president të popullit, por thjesht një i përkëdhelur i atyre që emëruan dhe shkarkuan disa herë në këto 30 vjet. Të gjithë heshtën sepse në fund e panë sesi u përdor dhe sot ja hodhën si mish gjahu që ta shqyejnë të gjithë nga pak. Heshtën edhe për një arsye tjetër…. Askush nuk dëshiron të bashkohet funeralit të tij politik, pasi e kanë të qartë çfarë gijotine po e pret nga ata që i kërcënonte se do ju hante veshin apo do i hidhte në Malin me Gropa. Të gjithë heshtin kur e kuptojnë që i ke bërë gropën vetes.”
