Kryetari i Partisë Demokratike, Sali Berisha, në një konferencë për mediat, së bashku me bashkëkryetarin e Komisionit për Reformën Territoriale, Luçiano Boçi, si dhe me ekspertë të fushës ka kundërshtuar propozimin e mazhorancës për shkrirjen 15 bashkive të vendit.
Berisha e cilësoi nismën si një veprim që dëmton komunitetet lokale dhe thellon braktisjen e zonave të largëta. Ai akuzoi qeverinë se po ndjek një proces të njëanshëm, ndërsa kërkoi një reformë të re territoriale të bazuar në konsultime të gjera dhe ekspertizë profesionale.
Berisha: Rama do vazhdojë krimin e tij monstruoz ndaj shqiptarëve duke reduktuar edhe 15 bashki. U tërhoq nga reforma territoriale në mënyrë të njëanshme kur e kuptoi se ka ngjallur pakënaqësi të madhe Dhe pas kësaj antireformë vazhdohet në mënyrën më të papërgjegjshme, më antishqiptare që nga 60 të kalojnë në 40.
Natyrisht në 14 vite nuk zhbëhen dot ajo boshatisje e madhe që ka ndodhur, ajo braktisje e madhe që ka ndodhur, por një hap i rëndësishëm edhe drejt ripopullimit të zonave të devastuara, drejt ripopullimit të tyre, duhet të jetë edhe reforma territoriale.
Berisha gjithashtu hodhi akuza ndaj bashkëkryetarit të Komisionir, Arbjan Mazniku, të cilin e quajti peng.
Berisha: Grupi i punës për reformën territoriale me bashkëkryetar Arbër Maznikun, një peng i njohur për shumë vese të tij, kur e them këtë, e them, një njeri që zbaton verbërisht urdhra bashkë me Ervin Demon, dy armiq kryesorë të komuniteteve lokale në Shqipëri me në krye Edi Ramën, dhe punuan, bënë konsulta në mbar vendin, mbeti konsulta në Tiranë për të finalizuar serinë e konsultave. Edi Rama e kuptoi se e ka betejë të humbur.
E kuptoi se reforma territoriale ka ngjallur një pakënaqësi të madhe dhe se kudo që shkuan në konsulta, u mbështetën sugjerimet dhe qëndrimet e përfaqësuesve të PD. U tërhoq në mënyrë të njëanshme, të padenjë, paraqiti në parlament një raport që nuk u paraqit në komision, që nuk mund të paraqitej kurrë në parlament, dhe e publikoi atë në të cilin tregon se në krimin e tij monstruoz kundër shqiptarëve nuk ndalet, do të heqë edhe 15 bashki të tjera, të reduktojë numrin e bashkive në vendin më malor të Evropës.
